بزووتنه‌وه‌ی حه‌ماس به‌رپرسیاره‌تی ئه‌و هێرشه‌ی گرته‌ئه‌ستۆ كه ئه‌مڕۆ له شاری قودس ئه‌نجامدرا و به‌هۆیه‌وه 3 هاووڵاتیی ئیسڕائیلی هاتنه كوشتن.
بزووتنه‌وه‌ی حه‌ماس له به‌یاننامه‌یه‌كدا ڕایگه‌یاند: سه‌رله‌به‌یانی ئه‌مڕۆ پێنجشه‌م دوو ئه‌نداممان به‌ناوه‌كانی موڕاد و ئیبراهیم ئه‌لنه‌مر له شه‌قامی رامووت هێرشێكیان ئه‌نجام دا و به‌هۆیه‌وه سێ ئیسڕائیلی كوژران و چه‌ندانی دیكه‌ش بریندار بوون.
بزووتنه‌وه‌ی حه‌ماس هه‌روه‌ها هۆشداریشی دایه ئیسڕائیل كه ئیتر ده‌بێت له هه‌موو شار و كووچه و كۆڵانێكدا له خۆیان بترسن و چه‌كداری دیكه‌یان ئاماده‌ن بۆ ئه‌نجامدانی تۆڵه‌سه‌ندنه‌وه.
لای خۆشییه‌وه ده‌سه‌ڵاتدارانی ئیسڕائیل له‌باره‌ی هێرشه‌كه‌ی ئه‌مڕۆ ئاماژه‌یان به‌وه‌دابوو كه له‌لایه‌ن دوو برای فه‌ڵه‌ستینی له باكوری رۆژئاوای قودس ئه‌نجامدراوه و به‌هۆیه‌وه 3 كه‌س كوژراون و 12ی دیكه‌ش بریندار بوون.
پۆلیسی ئیسڕائیل جه‌ختیشی كرده‌وه كه توانیویانه هه‌ردوو ئه‌نجامده‌ری هێرشه‌كه بكوژن.
ئه‌مه له‌كاتێكدایه كه هه‌ر ئه‌مڕۆ پێنجشه‌م هه‌ردوو لایه‌نی ئیسڕائیلی و بزووتنه‌وه‌ی حه‌ماس ڕێككه‌وتن له‌سه‌ر درێژكردنه‌وه‌ی ماوه‌ی ئاگربه‌ست و به‌مه‌ش كۆی گشتی ماوه‌ی ئاگربه‌ست و ڕاوه‌ستانی شه‌ڕ بووه 7 رۆژ.
له ماوه‌ی ئه‌م حه‌وت رۆژه‌ی ئاگربه‌ستدا هه‌ردوو لایه‌نی ئیسڕائیلی و بزووتنه‌وه‌ی حه‌ماس ده‌یان دیل و ده‌ستگیركراویان له‌نێوانیاندا ئازادكردووه.
کۆمێنت (0)
تا ئێستا هیچ کۆمێنتێک نەکراوە.