وەزارەتی تەندروستی ڕوونکردنەوە لەبارەی دەرمانە ژەهراوییەکەی منداڵان دەدات

دوای بڵاوبوونەوەی هەواڵێک لە (کوردستان تیڤی)، سەبارەت بە بوونی ماددەیەکی ژەهراویی لە دەرمانێکی منداڵان لایەنە پەیوەندیدارەکان وەزارەتی تەندروستی هەرێمی کوردستان و وەزارەتی تەندروستی عێراق هاتنەسەر خەت، وەزارەتی تەندروستی عێراق بەفەرمی لەمبارەیەوە ڕوونکردنەوەیەکی بڵاو کردەوە.

ئەمڕۆ شەممە 29ـی 07ـی 2023 لە ڕوونکردنەوەیەکدا د. سەیف بەدر گوتەبێژی وەزارەتی تەندروستی عێراق سەبارەت بە دەرمانی (کۆلد ئاوت) ڕایگەیاند: دەرمانی (Cold Out) لە وەزارەتی تەندروستی عێراق تۆمار نەکراوە، فرۆشتنی دەرمانەکە بە پێشێلکردنی یاسا دادەنرێت.

ڕاشیگەیاند: ناتوانرێت بازرگانی بە هیچ جۆرە دەرمانێک بکرێت یان دروست بکرێت، بەبێ ئەوەی تۆمار بکرێت بەپێی ئەو ڕێکار و کۆنترۆڵە یاسایی و زانستییانەی کە وەزارەتی تەندروستی پەسەندی کردووە.

گوتەبێژی وەزارەتی تەندروستی عێراق لەمبارەیەوە هۆشداریی دا کە لە ئەگەری گرتنی هەر سەرپێچییەک، بەپێی قەبارە و جۆری سەرپێچییەکە و بەپێی ئەو یاسایەی کە لەلایەن دەسەڵاتە پەیوەندیدارەکانەوە کارپێکراوە بۆ چاودێریکردنی مامەڵەی دەرمان و پێداویستییە پزیشکییەکان، سزا دەدرێن.

دوێنێ هەینی، (کوردستان تیڤی) هەواڵێکی لەبارەی دەرمانی (کۆلد ئاوت) بڵاو کردەوە، کە لە لە تاقیگەی (Valisure)ـی ئەمریکی  پشکنین بۆ دەرمانی کۆلد ئاوت کراوە و دەرکەوتووە بە ڕێژەی 2.1%ـی (ئیسیلین گلایکۆل)ـی تێدایە، کە ئەم ڕێژەیە نزیکەی 21 هێندەی سنووری قبوڵکراوی ئیسیلین گلایکۆلە، بڕێکی کەم لەم ماددەیە بۆ مرۆڤ کوشندەیە و ڕۆڵی لە مردنی بەکۆمەڵی منداڵان هەبووە.