چاڤی هێرناندیزی ڕاهێنه‌ری یانه‌ی سه‌دی قه‌ته‌ڕی و پاڵێوراوی یه‌كه‌م بۆ وه‌رگرتنی ئه‌ركی ڕاهێنه‌رایه‌تی یانه‌ی به‌رشه‌لۆنه‌ی ئیسپانی بۆچوونی خۆی له‌باره‌ی ئه‌گه‌ری وه‌رگرتنی ڕاهێنه‌رایه‌تی یانه‌كه خسته‌ڕوو.
چاڤی له كۆنگره‌یه‌كی ڕۆژنامه‌وانیدا له‌باره‌ی ده‌نگۆی وه‌رگرتنی ڕاهێنه‌رایه‌تی یانه‌ی به‌رشه‌لۆنه ڕایگه‌یاند: ئێستا من هه‌موو توانا و هزرم لای یانه‌ی ئیتحاده و به هیچ شێوه‌یه‌ك ناتوانم له‌باره‌ی ئه‌گه‌ری وه‌رگرتنی ڕاهێنه‌رایه‌تی یانه‌ی به‌رشه‌لۆنه لێدوانێك بده‌م.
یانه‌ی به‌رشه‌لۆنه كه له مێژووی زێڕینی خۆیدا 26 جار پاڵه‌وانی ئیسپانیا بووه و 5 جاریش پاڵه‌وانی خولی یانه پاڵه‌وانه‌كانی ئه‌وروپا، شه‌وی چوارشه‌می ڕابردوو دوورخستنه‌وه‌ی ڕۆناڵد كۆمانی هۆڵه‌ندی له ڕاهێنه‌رایه‌تی یانه‌كه ڕاگه‌یاند دوای شكستی یانه‌كه به‌رامبه‌ر یانه‌ی ڕایۆ ڤالیكانۆ له خولی ئیسپانیا به گۆڵێكی بێ وه‌ڵام.
یانه ئیسپانییه‌كه ئێستا به‌بێ ڕاهێنه‌رێكی فه‌رمییه و دوێنێ پێنجشه‌میش سێرجی پارخوان راهێنه‌ری تیپی دووه‌م وه‌ك ڕاهێنه‌ری كاتی یانه‌كه ده‌ستنیشان كرا و مه‌شق و ڕاهێنانی به یاریزانن كرد.
یانه‌ی به‌رشه‌لۆنه دوای ئه‌نجامدانی 10 یاریی له وه‌رزی ئه‌مساڵی خولی ئیسپانیا، ئێستا به كۆكردنه‌وه‌ی 15 خاڵ له ڕیزبه‌ندی 9ی یانه‌كان دێت و 4 سه‌ركه‌وتن و 3 یه‌كسان و 3 شكستی هه‌یه.
جێی باسه چاڤی ته‌مه‌ن 41 ساڵ ڕۆژی هه‌ینی ڕابردوو نوێترین ده‌ستكه‌وتی له‌گه‌ڵ یانه‌ی سه‌دی قه‌ته‌ڕی برده‌وه دوای ئه‌وه‌ی له یاریی كۆتایی جامی میری قه‌ته‌ڕ به لێدانی یه‌كلاكه‌ره‌وه‌ی سزا له یانه‌ی ڕه‌یانی برده‌وه.
کۆمێنت (0)
تا ئێستا هیچ کۆمێنتێک نەکراوە.