له‌ بۆندس لیگادا بروسیا دۆڕتمۆند سه‌رکه‌وتنی به‌سه‌ر ماینز تۆمارکرد

یانه‌ی بروسیا دۆرتمۆند سه‌ركه‌وتنی له‌ هه‌فته‌ی هه‌شته‌می خولی یانه‌كانی ئه‌ڵمانیا به‌ده‌ستهێناو به‌ سێ گۆڵ به‌رامبه‌ر به‌ گۆڵێك له‌ یانه‌ی ماینزی میوانی برده‌وه.
 یاریزانانی دۆرتمۆند هه‌ر له‌ سه‌ره‌تاوه‌ به‌ شێوه‌یه‌كی به‌هێز ده‌ركه‌وتن و سێ خوله‌ك دوای فیكه‌ی ده‌ستپێكی یاری، ماركۆ ڕیۆس گۆڵێكی بۆ تیپی میواندار تۆماركرد، له‌ خوله‌كی په‌نجاوچواریشدا، ئێرلینگ هالاندی نۆرێژی و ئه‌ستێره‌ی دۆرتمۆند گۆڵی دووه‌می تیپه‌كه‌ی به‌ لێدانی سزا به‌ده‌ستهێنا.
 له‌و لاشه‌وه‌ یاریزان جۆناتان بوركاردێت سوودی له‌ ده‌رفه‌تێك وه‌رگرت و گۆڵێكی بۆ ماینز له‌ خوله‌كی هه‌شتاوحه‌وت تۆماركردو جیاوازی گۆڵه‌كانی له‌ نێوان هه‌ردوو تیپ كه‌مكرده‌وه‌، له‌ دواساته‌كانی یاریشدا، ئێرلینگ هالاند گۆڵی دووه‌می خۆی و سێیه‌می میوانداره‌كانی به‌ده‌ستهێنا.
 به‌م بردنه‌وه‌ش كۆی خاڵه‌كانی دۆرتمۆند بۆ هه‌ژده‌ خاڵ به‌رزبووه‌وه‌و به‌ شێوه‌ی كاتی سه‌ركه‌وت بۆ پێشه‌نگی ڕیزبه‌ندی یانه‌كان، ماینزیش سێیه‌م یاری له‌سه‌ریه‌كی دۆڕاندو به‌ ده‌ خاڵ له‌ پله‌ی یازده‌می ڕیزبه‌ندی دێت.