له به‌رده‌واميى سه‌ردانه‌كه‌يدا بۆ به‌ريتانيا، ئێواره‌ى ئه‌مڕۆ پێنجشه‌ممه 2021/9/16 نێچيرڤان بارزانى، سه‌رۆكى هه‌رێمى كوردستان، له له‌نده‌ن پێشوازى له جۆن مێجه‌ر سياسه‌تمه‌دار و سه‌رۆك وه‌زيرانى پێشووترى به‌ريتانيا و دۆستى گه‌لى كوردستان كرد.
له ديدارێكدا نێچيرڤان بارزانى سوپاس و پێزانينى گه‌لى كوردستانى بۆ جۆن مێجه‌ر دووپات كرده‌وه بۆ ئه‌و پشتيوانى و هاوكارييه‌ى نه‌وه‌ده‌كانى سه‌ده‌ى ڕابردوو له ڕۆژانى ته‌نگانه‌دا پێشكه‌شى كرد و له‌گه‌ڵ وڵاتانى ديكه‌ى دۆست به هاناى گه‌لى كوردستانه‌وه هاتن كه له ئه‌نجامدا بڕيارى 688ى نێوده‌وڵه‌تى ده‌رچوو و ناوچه‌ی نه‌فڕين و نه‌واى ئارام بۆ گه‌لى كوردستان دامه‌زرا.
له‌مباره‌يه‌وه نێچيرڤان بارزانى گوتى: گه‌لى كوردستان هه‌رگيز هاوسۆزی و دۆستايه‌تيى جه‌نابتان و گه‌ل و حكوومه‌تى به‌ريتانيا و وڵاتانى ديكه‌ى دۆست له بير ناكات و هه‌ميشه به ڕێز و پێزانينه‌وه له هاوكارى و پشتگيريتان و له بایه‌خدانی به‌رده‌وامتان به دۆزه ڕه‌واکه‌ی ده‌ڕوانێت.
لاى خۆيه‌وه جۆن مێجه‌ر سۆز و خۆشه‌ويستيى خۆى بۆ گه‌لى كوردستان دووپات كرده‌وه و هيواى سه‌ركه‌وتنى بۆ گه‌ل و ئه‌زموونى هه‌رێمى كوردستان خواست.
تاوتوێكردنى دۆخى سياسى و ئه‌منيى عيراق و ناوچه‌كه به‌گشتى و ئه‌مڕۆی هه‌رێمی کوردستان و ده‌سکه‌وته‌کانی سی ساڵ دوای ئه‌و مێژووه، ته‌وه‌رێكى ديكه‌ى ديداره‌كه بوو.
کۆمێنت (0)
تا ئێستا هیچ کۆمێنتێک نەکراوە.