ئەڤرۆ رۆژا سێشەمبی رێکەفتی ٢٠٢١/٧/١٣ ”د.عەلی تەتەر” پارێزگارێ دهۆکێ ژلایێ بەرێز ” تۆماس کۆفن” Thomas Kufen پارێزگارێ ئێسنێ ل کۆمارا فیدرالیا ئەلمانیا هاتە پێشوازیکرن.
دهەڤدیتنێدا ل دۆر پەیوەندییێن پارێزگەها دهۆکێ و ئێسنێ دانوستاندن هاتەکرن کو بەری نۆکە دەستە خۆشکی دناڤبەرا وان دا د بیاڤێ ساخلەمیێ دا هەبوو و دسەرەدانێدا هەردوولا دۆپاتکر کو ئەڤ پەیوەندیە دێ هێتە بەرفرەهکرن و د بیاڤێن بەرگریا شارستانی، پەروەردە، بازرگانی و وەبەرهێناندا.
دپەیڤەکێدا پارێزگارێ ئێسنێ سۆپاسیا سەرەدانا پارێزگارێ دهۆکێ کر بۆ کۆمارا فیدرالیا ئەلمانیا و پارێزگەها ئێسنێ و دادیارکرن: ئەم سۆپاسیا حکۆمەتا خۆجهی و خەلکێ پارێزگەها دهۆکێ دکەین کو هندی هژمارا ئاکنجیێن خۆ ئاوارە و پەنابەر حەواندیین و هەروەسا گۆت دەستە خۆشکیا مە دگەل پارێزگەها دهۆکێ دێ یا بەردەوام بیت و بەرفرەهتر لێ دهێت.
پارێزگارێ دهۆکێ دپەیڤەکێدا سۆپاسیا پێشوازیا گەرما پارێزگارێ ئێسنێ کر و راگەهاند ئەم سۆپاسیا هاریکاریێن مرۆڤایەتی یێن کۆمارا فیدرالیا ئەلمانیا و هەوە دکەین، هیڤیدارین ئەڤ پەیوەندیی و هەماهەنگیە یا بەردەوام بیت و پێشڤەچوونێ بخۆڤە بینیت.
دڤێ هەڤدیتنێدا پارێزگارێ دهۆکێ سۆپاسیا رۆلێ گرنگ و کاریگەرێ رێکخراوا کاریتاس د پێشکێشکرنا هاریکاریان و ئاڤاکرنا پەیوەندیان داکر و لوگویێ رێزلێنانێ یێ پارێزگەها دهۆکێ پێکێشی بەرێز “مارکۆس کامپلینک” رێڤەبەرێ گشتی یێ رێکخراوێ کر.
کۆمێنت (0)
تا ئێستا هیچ کۆمێنتێک نەکراوە.