میدیاکانی به‌ریتانیا: لیڤەرپول بە هیچ شێوەیەک ئامادەنیە دەستبەرداری محەمەد سەڵاحی بێت بۆ یانەی ڕیال مەدرید

بەگوێرەی میدیاكانی به‌ریتانیا، یانەی لیڤەرپول بە هیچ شێوەیەك ئامادەنیە دەستبەرداری محەمەد سەڵاحی ئەستێرە میسریەكەی بێت بۆ یانەی ڕیال مەدرید لە مێركاتۆی هاوینەی داهاتوودا.
 ئەویش دوای ئەوەی سەڵاح لە دیدارێكی ڕۆژنامەوانیدا ڕایگەیاندبوو كە ئارەزوو دەكات بچێتە خولی ئیسپانیا، ڕۆژنامەی دەیلی مەیلی بریتانی ئاشكرای كرد كە ئیدارەی لیڤەرپول ئامادەنیە گفتوگۆ لەگەڵ ڕیال مەدرید یان هەر یانەیەكی دیكە بكات بۆ دەستبەرداربوونی لە تواناكانی هێرشبەرە میسریەكە.
 هەمان ڕۆژنامە ڕوونیشیكردەوە كە لەو كاتەی لە هاوینی ساڵی دووهەزاروحەڤدە محەمەد سەڵاح لە یانەی ڕۆماوە پەیوەندی بە لیڤەرپول كرد، لەو كاتەوە ئیدارەی ڕێدز بیری لە فرۆشتنی یاریزانەكە نەكردۆتەوە.
 ڕۆژنامەی دەیلی مەیل ڕوونیشیكردەوە كە ئەگەر سەڵاح لە هاوینی داهاتوو ڕیزی لیڤەرپول بەجێنەهێڵێت ئەوا ڕەنگە گرێبەستی لەگەڵ تیپەكەی درێژبكاتەوە، گرێبەستی ئێستاشی لەگەڵ یانەكەی لە ساڵی دووهەزاروبیستوسێ‌ تەواودەبێت .