له‌سه‌ر زانیاری ئاسایشی سلێمانی، لیژنه هاوبه‌شه‌كانی قایمقامیه‌ت ده‌ست به‌سه‌ر بڕێكی زۆر جگه‌ری به‌ستوی قه‌ده‌غه‌كراودا ده‌گرن نوێنه‌ری ڤێتێرنه‌ریش ده‌ڵێت، رێكاری یاسایی به‌رامبه‌ر خاوه‌نه‌كه‌ی ده‌گیرێته‌به‌ر.
ده‌روێش فه‌ره‌ج، نوێنه‌ری به‌ڕێوه‌به‌رایه‌تی ڤێتێرنه‌ری سلێمانی له لیژنه هاوبه‌شه‌كانی قایمقامیه‌ت رایگه‌یاند: له‌سه‌ر زانیاری به‌ڕێوه‌به‌رایه‌تی ئاسایشی سلێمانی لیژنه هاوبه‌شه‌كان ده‌ست به‌سه‌ر نیو تۆن جگه‌ری به‌ستوی قه‌ده‌غه‌كراودا ده‌گرن كه خاوه‌نه‌كه‌ی به‌شێوه‌یه‌كی نایاسایی له وڵاتی ئێرانه‌وه به‌نیازی ساغكردنه‌وه له بازاڕه‌كانی شاری سلێمانی، هاورده‌ی كردووه.
وتیشی: چه‌ندینجار پشكنینی بایۆلۆجی بۆ كراوه، به‌ڵام به‌هۆی ناسكی ئۆرگانه‌كانی و زوتێكچونیی له پشكنین ده‌رنه‌چوه، بۆیه له‌لایه‌ن وه‌زاره‌تی كشتوكاڵه‌وه هاورده‌كردنی قه‌ده‌غه‌كراوه و هه‌روه‌ها به‌پێی رێنماییه ته‌ندروستی و ڤێتێرنه‌رییه‌كان جگه‌ری به‌ستو كه یه‌كجار خاوبوه‌وه نابێت بۆ دوباره به‌ستنه‌وه‌ی بخرێته‌وه ناو به‌فرگر.
رونیكرده‌وه: به‌سوپاسه‌وه به‌ڕێوه‌به‌رایه‌تی ئاسایشی سلێمانی، به پێدانی زانیاری و ده‌ست به‌سه‌ردا گرتنی ئه‌و كاڵاوشمه‌كه خراپبوانه یان ده‌رچونی ئه‌ندامه‌كانی له‌گه‌ڵ لیژنه هاوبه‌شه‌كانی قائیمقامیه‌ت، هه‌میشه پشتیوان و هاوكاری ته‌واوی لیژنه‌كانه.
ئاماژه‌ی ئه‌وه‌شكرد: به‌فه‌رمانی قایمقامی سلێمانی ته‌واوی ئه‌و جگه‌ره به‌ستوه‌‌ی له‌لایه‌ن به‌ڕێوه‌به‌رایه‌تی ڤێتێرنه‌ری سلێمانی له‌ناوده‌برێت و خاوه‌نه‌كه‌شی روبه‌ڕوی رێكاری یاسایی ده‌كرێته‌وه.
کۆمێنت (0)
تا ئێستا هیچ کۆمێنتێک نەکراوە.