له پارێزگای فارسی ئێران كه‌سێك كه تاوانی كوشتنی مامۆستای ئاینیی، حوجه‌تولئیسلام محه‌مه‌د خورسه‌ند-ی به‌سه‌ردا سه‌پێنرابوو، له گۆڕه‌پانێكی كراوه، له‌به‌رده‌م خه‌ڵكدا له‌سێداره درا.
به‌پێی هه‌واڵێكی ته‌له‌ڤیزیۆنی ئێران، له شارۆچكه‌ی كازه‌رونی سه‌ربه پارێزگای فارس، حامید ره‌زا دره‌خشه‌نده كه به تاوانی كوشتنی پێشنوێژ و گوتاربێژی هه‌ینیی، حوجه‌تولئیسلام محه‌مه‌د خورسه‌ند مه‌حكومكرابوو، سه‌ر له‌به‌یانی ئه‌مڕۆ له گۆڕه‌پانێكی كراوه به‌ڕووی خه‌ڵكدا له‌سێداره دراوه.
پێشنوێژ و گوتاربێژی هه‌ینیی شارۆچكه‌ی كازه‌رون، حوجه‌تولئیسلام محه‌مه‌د خورسه‌ند رۆژی ٢٩ی ئایار له‌میانی گه‌ڕانه‌وه له پرۆگرامێكی شه‌وی قه‌در، له‌به‌رده‌م ماڵه‌كه‌ی خۆیدا درابوویه به‌ر چه‌قۆ و كوژرابوو.
ئه‌و كه‌سه‌ی له دوای هێرشه‌كه، به تاوانی ئه‌نجامدانی تاوانه‌كه ده‌ستبه‌سه‌ركرابوو، به كه‌متر له سێ مانگ پرۆسه‌ی دادگاییكردنی ته‌واوبوو، و سه‌پاندنی سزای له‌سێداره‌دان به‌سه‌ریدا ببووه جێگه‌ی سه‌رنج.
لای خۆیه‌وه سه‌رۆكی ده‌زگای دادوه‌ریی پارێزگای فارس، كازم مووسه‌ویی، رایگه‌یاند به‌له‌به‌رچاوگرتنی هه‌ستیاریی بابه‌ته‌كه و ئه‌و دڵته‌نگییه‌ی له‌نێو رایگشتییدا درووستیكردووه، ئه‌م دۆسیه‌یه له كورتترین ماوه‌ی گونجاودا، به ئه‌نجام گه‌یه‌نرا.
پێشنوێژ و گوتاربێژانی هه‌ینی، به نوێنه‌ری رابه‌ری شۆڕشی ئێران له ناوچه‌كانی خۆیان ئه‌ژمارده‌كرێن.
کۆمێنت (0)
تا ئێستا هیچ کۆمێنتێک نەکراوە.