كچه یاریزانی چیكی ماركێتا ڤۆندرۆسۆڤا گه‌یشته یاری كۆتایی پاڵه‌وانێتی نێوده‌وڵه‌تی ڕۆلان گارۆسی فه‌ڕه‌نسی له یاری تێنسی سه‌رزه‌وی له ئاستی خانمان
له قۆناغی پێش كۆتاییدا ڤۆندرۆسۆڤای ته‌مه‌ن نۆزده ساڵ و پۆلێنكراوی سیی و هه‌شته‌می ڕیزبه‌ندی كچه تێنسزانانی جیهان به دوو كۆمه‌ڵه‌ی بێ به‌رامبه‌رو ئه‌نجامی كۆمه‌ڵه‌كان حه‌وت پێنج، حه‌وت شه‌ش له جۆهانا كۆنتای به‌ریتانی و پۆلێنكراوی بیستوشه‌شه‌می ڕیزبه‌ندی جیهانی برده‌وه، ڤۆندرۆسۆڤا له هه‌ردوو كۆمه‌ڵه‌ی یاریه‌كه له دواوه‌بوو، به‌ڵام توانی هه‌ردوو كۆمه‌ڵه به‌قازانجی خۆی هه‌ڵگه‌ڕێنێته‌وه، له دووه‌م یاری قۆناغی پێش كۆتایی پاڵه‌وانێتیه‌كه‌دا، ئاشلی بارتی ئوسترالی و پۆلێنكراوی هه‌شته‌می ڕیزبه‌ندی جیهان به‌ربه‌ستی ئه‌ماندا ئه‌نیسیمۆڤای ئه‌مه‌ریكی بڕی و دووه‌م بلیتی یاری كۆتایی به‌ده‌ستهێنا، بارتی له كۆمه‌ڵه‌ی یه‌كه‌م به شه‌ش حه‌وت له دواوه بوو، به‌ڵام دواتر هه‌ردوو كۆمه‌ڵه‌ی دووه‌م و سێیه‌می به ئه‌نجامی شه‌ش سێ، شه‌ش سێ برده‌وه‌و گه‌یشته یاری كۆتایی.
کۆمێنت (0)
تا ئێستا هیچ کۆمێنتێک نەکراوە.