ئەمڕۆ چوارشەممە ئەیاد عەللاوی سەرۆكی هاوپەیمانیی نیشتمانی و سەرۆك وەزیرانی پێشووتری عێراق راگەیەندراوێكی لەبارەی تیرۆركردنی كادیرێكی پارتی لە كەركووك بڵاو كردەوە و ئەوەی وەبیرهێناوە كە ماوەیەكی زۆرە داوای چارەسەركردنی كێشەكانی كەركووك دەكات.
عەللاوی لە راگەیەندراوەكەیدا تیرۆركردنی جەبار عارف رەشید بەرپرسی رێکخراوی (موسەڵا)ی پارتی لە كەركووك پرۆتیستۆ کردووە و رایگەیاند پێویستە چارەسەری پێویست بۆ دۆخی شارەكە بدۆزرێتەوە.
سەرۆكی هاوپەیمانی نیشتمانی ئاماژەی بەوەش داوە كە ماوەیەكی زۆری هۆشداریان داوە لە خراپتربوونی دۆخی كەركووك و ناوچەكانی تری جێی ناكۆكی، دووپاتیشی كردەوە كە پێویستە گفتوگۆیەكی نیشتمانی بەپەلە بۆ چارەسەری دۆخی كەركووك ئەنجام بدرێت، نەوەك مافیاكان و تیرۆریستان ئەم دۆخە بقۆزنەوە و شارەكە بگەڕێنەوە چوارگۆشەی یەكەم.
دوێنێ سێشەممە لە گەڕەکی رووناکی لە شاری کەرکووک، دوو کەس بە سواری ماتۆڕسکیلێکەوە تەقەیان لە جەبار عارف رەشید بەرپرسی رێکخراوی موسەڵای پارتی لە كەركووك کرد، لە ئەنجامدا جەبار عارف شەهید كرا و بکوژەکانیش هەڵاتن.
کۆمێنت (0)
تا ئێستا هیچ کۆمێنتێک نەکراوە.