وه‌زیرى خوێندنى باڵاى حكومه‌تى هه‌رێم، یوسف گۆران له‌گه‌ڵ مورتەزا عەبادى سەرکونسوڵى کۆمارى ئیسلامى ئێران لە هەولێر كۆبوویه‌وه و له‌و میانه‌یه‌دا بڕیار درا، وه‌زاره‌تى خوێندنى باڵا پیشانگه‌یه‌ك بۆ به‌رهه‌مى زانكۆ ئێرانییه‌كان بكاته‌وه و هه‌ردوولا رێككه‌وتنێكیش واژوو بكه‌ن.
به‌شى راگه‌یاندنى وه‌زاره‌تى خوێندنى باڵا روونیكردووه‌ته‌وه، یوسف گۆران به‌گرنگیه‌وه باسی له به‌هێزكردنی په‌یوه‌ندییه‌كانی نێوان هه‌رێمی كوردستان و كۆماری ئیسلامی ئێرانى له بواری خوێندنی باڵا كردووه.
هه‌روه‌ها جه‌ختى كردووه‌ته‌وه، كه له هه‌وڵه‌كانیان بۆ په‌ره‌پێدانی په‌یوه‌ندییه‌كان به‌رده‌وام ده‌بن.
ئاماژه بۆ ئه‌وه‌شكرداوه، له‌و كۆبوونه‌وه‌یه‌دا بڕیاردرا وه‌زاره‌تی خوێندنی باڵا و توێژینه‌وه‌ی زانستی رێككه‌وتنامه‌یه‌ك له‌گه‌ڵ زانكۆكانی ئێران ئیمزا بكات.
ئه‌وه‌ش خراوه‌ته‌ڕوو، كه گفتوگۆ له‌باره‌ی كردنه‌وه‌ی پێشانگه‌ی تایبه‌تی ناساندنی توانای زانكۆكانی كۆماری ئیسلامی ئێران له هه‌رێمی كوردستان كراوه بڕیاره له رۆژانی داهاتوودا بكرێته‌وه.
کۆمێنت (0)
تا ئێستا هیچ کۆمێنتێک نەکراوە.