كۆمیسیۆنی مافه‌كانی مرۆڤ داوای به‌په‌له گه‌یاندنی خۆراك و ده‌رمان و پێویستییه‌كانی خۆ گه‌رمكردنه‌وه بۆ ئاواره‌كانی كه‌مپه‌كانی نه‌ینه‌وا ده‌كات.
دكتۆر فازل غه‌ڕاوی، ئه‌ندامی كۆمیسیۆنی مافه‌كانی مرۆڤ له عێراق له لێدوانێكدا رایگه‌یاند: به‌هۆی بارانی به‌خوڕی چه‌ند رۆژی رابردوو به‌تایبه‌ت دوێنێ هه‌ینی نزیكه‌ی سێ هه‌زار خێوه‌ت له كه‌مپه‌كانی مه‌دره‌ج و جه‌دعه له پارێزگای نه‌ینه‌وا تووشی هه‌ڵكه‌ندن و نغرۆ بوون له ئاو بوونه‌ته‌وه و پێویسته ده‌ستبه‌جێ حكوومه‌تی عێراق و رێكخراوه مرۆییه‌كان به‌هانای دانیشتوانی ئه‌و كه‌مپانه‌وه بچن بۆ ئه‌وه‌ی كاره‌ساتی گه‌وره روونه‌دات.
هه‌روه‌ها ده‌ڵێت : داوا له حكوومه‌تی عێراق ده‌كه‌ین به‌زووترین كات كار بكات بۆ گێڕانه‌وه‌ی ئاواره‌كان بۆ ناوچه‌كانی خۆیان پێش ئه‌وه‌ی رووبه‌ڕووی مه‌ترسیی مردن ببنه‌وه له كه‌مپه‌كاندا، هه‌روه‌ها داوا له وه‌زاره‌تی بازرگانی و ته‌ندروستی و كۆچ و كۆچبه‌رانیش ده‌كه‌ینه‌وه له گه‌ڵ ئاژانسه‌كانی نه‌ته‌وه یه‌كگرتووه‌كان كه له عێراق كارده‌كه‌ن په‌له بكه‌ن بۆ به‌ڕێكردنی قافڵه‌ی فریاگوزاریی مرۆیی به‌په‌له له ده‌رمان و خۆراك و به‌تانی و شیری منداڵ و دروستكردنی كه‌مپی دیكه بۆ پێشوازی لێكردنییان له بری ئه‌و كه‌مپانه‌ی كه نغرۆی ئاوو بوون له پارێزگای نه‌ینه‌وا.
کۆمێنت (0)
تا ئێستا هیچ کۆمێنتێک نەکراوە.