وەزارەتی ناوخۆی حکومەتی هەرێمی کوردستان رێکارەکانی تایبەت بەکردنەوەی بەڕێوەبەرایەتی پاسپۆرتی هەڵەبجە دەست پێکردووە و بۆ ئەو مەبەستەش بڕی 185 ملیۆن دیناری تەرخانکردووە.
لەو بارەیەوە، عەمید سالار عبدوڵڵا، بەڕێوەبەری پاسپۆرتی پارێزگای سلێمانی رایگەیاند: "دوای وەرگرتنی رەزامەندی حکومەتی عێراق بۆکردنەوەی بەڕێوەبەرایەتی پاسپۆرتی پارێزگای هەڵەبجە بەشێوەیەکی سەربەخۆ، وەزارەتی ناوخۆی حکومەتی هەرێمیش، رێکارەکانی تایبەت بەکردنەوەی ئەو بەڕێوەبەرایەتییەی دەست پێکرد و باڵەخانەیەکیش بۆ ئەو مەبەستە وەرگیراوە".
عەمید سالار گوتیشی: "لەلایەن ئەنجومەنی وەزیرانەوە بڕی 185 ملیۆن دینار بۆ دابینکردنی پێداویستییەکانی باڵەخانەکە تەرخان کراوە و لیژنەیەکی وەزارەتی ناوخۆش سەرقاڵی دیزاینکردنی باڵەخانەکەن و لەداهاتوویەکی نزیکدا باڵەخانەکە تەواو دەکرێت"
بەڕێوەبەری پاسپۆرتی سلێمانی رایگەیاند، لەڕێگای مانگی دەستکردەوە بەڕێوەبەرایەتییەکە دەبەسترێتەوە بە بەغداوە و پەیوەندیی دروست دەکرێت.
کۆمێنت (0)
تا ئێستا هیچ کۆمێنتێک نەکراوە.