بەهۆی باران بارینی بەخوڕ و دروستبوونی لافاو، زیانی زۆر بەر پرۆژه خزمه‌تگوزارییه‌كانی ناوچه شاخاوییه‌كانی سنووری پارێزگای هه‌ولێر له هه‌ردوو ده‌ڤه‌ری باڵه‌كایه‌تی و برادۆست گەیشتووە، ته‌زووی كاره‌با، رێگاو بان و، پردی په‌ڕینه‌وه‌ی ده‌یان گوند زیانیان به‌ر كه‌وتووه.
له‌م باره‌یه‌وه بەرگری شارستانی سۆران رایگه‌یاند: لافاوەکەی شه‌وی پێنج شه‌ممه له‌سه‌ر هه‌ینی 10 باخ و رەزی هاووڵاتیانیش زییانیان پێگەیشتووە و ناحیەی سمیلان شەش دوكان ژێر ئاو كەوتوون.
بەیار باڵەكی ئەفسەری راگەیاندنی بەرگری شارستانی سۆران له راگه‌یه‌ندراوێكدا ئاماری زەرەر و زیانی لافاوی دوو رۆژی رابردووی راگه‌یاندو ئاماژەی بەوە کرد، لەسنووری حاجی ئۆمەران پردێك لەنێوان سۆرەپان و ناوگوند رووخاوە و هەروەها دوو ئۆتۆمبیلیش لافاو بردوونی لەگەڵ داڕمانی حەوت خانوو و سێ باخ .
ئەوەشی خستەڕوو، لەسنووری بنكەی بەرگری شارستانی سیدەكانیش سێ پرد رووخاون و 10 باخ و رەزی هاووڵاتیانیش زییانیان پێگەیشتووە، لەگەڵ زیانگەیاندن بەئۆتۆمبیلی هاوڵاتیەك.
باڵەكی جه‌ختیشكردەوە، لە سنووری ناحیەی سمیلان شەش دوكان ژێر ئاو كەوتوون پردێكی ئاسن داڕماوە و ئۆتۆمبێلی هاووڵاتیەكیش زیانی و چەندین باخ و رەزیش زەرەرمەندبوون.
بەرگری شارستانی سۆران باسی لەوەشکرد، لە دۆڵی باڵەیانی سەربە شارۆچكەی قەسرێش پردێك رووخاوە و 10 خانووی هاووڵاتیانش بەشێكیان وێران بوون و زیانیان پێگەیشتوە هەروەها زیان لە بنكەی تەندروستی و مزگەوتێك گەیشتووە، لەشارۆچكەی وەرتیو دۆڵی خانەقاش زیان لەژمارەیەك لەخانوو بەرەو نێو ماڵی هاووڵاتیان گەیشتووە و سێ پردی ناوچەكە زیانیان بەركەوتووە.
کۆمێنت (0)
تا ئێستا هیچ کۆمێنتێک نەکراوە.