بەسەرپەرشتیی وەزیری پێشمەرگە بە وەکالەت، كۆبوونه‌وه‌ى ئاسایی هاوپه‌یمانى نێوده‌وڵه‌تیى دژ به داعش، بەڕێوەچوو، جه‌خت له‌سه‌ر هاوكاری هاوپه‌یمانان و هه‌ماهه‌نگیان له‌نێوان هێزه‌كانى پێشمه‌رگه و سوپای عیراقی كرایه‌وه.
ئه‌مڕۆ دووشەممە 8/10/2018 به‌سه‌رپه‌رشتیی كه‌ریم سنجاری، وه‌زیری ناوخۆ و وه‌زیری پێشمه‌رگه (به وه‌كاله‌ت)، به ئاماده‌بوونی فه‌ریق جه‌بار یاوه‌ر، ئه‌مینداری گشتى و فه‌ریق جه‌مال مه‌حه‌مه‌د، سه‌رۆكى ئه‌ركانى وه‌زاره‌تى پێشمه‌رگه و ژماره‌یه‌ك له ئه‌فسه‌رانی پله باڵای وه‌زاره‌ت و نوێنه‌رانی وڵاتانی هاوپه‌یمان، كۆبوونه‌وه‌ی ده‌وری هاوپه‌یمانییه‌تی نێوده‌وڵه‌تی دژ به داعش له هه‌ولێر به‌ڕێوه‌چوو.
وەزارەتی پێشمەرگە، لەو راگەیاندراوێكدا، باسی لەوە کردووە، کە له‌و كۆبونه‌وه‌یه‌دا كه‌ریم سنجاری وه‌زیری ناوخۆ و وه‌زیری پێشمه‌رگه به‌وه‌كاله‌ت باسی له بارودۆخى ئه‌منى هه‌رێمى كوردستان و ناوچه‌كانى تری عیراق كردووە، جەختی لەوەش کردووەتەوە، کە جموجۆڵی تیرۆرستانى داعش له زیادبووندایه، له‌و باره‌یه‌وه به پێویستى زانیووە، کە پلانێكى هاوبه‌ش له نێوان پێشمه‌رگه و سوپای عیراق بۆ رووبه‌روبونه‌وه‌ى داعش دابندرێ.
ئەوەش روون کراوەتەوە، کە هه‌ر له‌و كۆبونه‌وه‌یه‌دا نوێنه‌ری هاوپه‌یمانان ئاماژه‌ى به‌دوا پێشهاته‌كانى سووریا و ئۆپه‌راسیۆنه‌كانى سوپای سووریای دیموكرات، بۆ پاكردنه‌وه‌ی ناوچه‌كانى ژێر ده‌ستى داعش و پاراستى سنووره‌كانى عێڕاق كرد، هاوكات مه‌ترسی ئه‌وه‌شی خسته‌ڕوو كه له ئه‌نجامى ئه‌و هه‌وڵانه به‌شێك له تیرۆرستانى داعش روو له هه‌رێمى كوردستان و عێڕاق بكه‌ن.
وەزارەتی پێشمەرگە، ئەوەشی خستووەتەڕوو، کە دواتر راپۆرته‌كانی ژووری ئۆپه‌راسیۆنی هاوبه‌ش و هه‌واڵگری و میره خوێندرایه‌وه، ئاماژه به رووداوه‌كانى چه‌ند رۆژی رابردوو له‌ناوچه جیاجاكانى عێڕاق كرا، هه‌ر له‌و كۆبوونه‌وه‌كه‌دا له‌لایه‌ن به‌رپرسانى ktcc له هاوپه‌یمانان و به‌رێوه‌به‌رایه‌تیى مه‌شقی وه‌زاره‌تى پێشمه‌رگه باس له دوا پێشهاته‌كانى پرۆسه‌ى مه‌شق و راهێنان كرا و تیشكخرایه سه‌ر گرنگی و بایه‌خی بنكه‌كانی مه‌شق كرایه‌وه.
کۆمێنت (0)
تا ئێستا هیچ کۆمێنتێک نەکراوە.