تۆڕی شەمس بۆ چاودێری هەڵبژاردن ڕاپۆرتی بەرایی خۆی تایبەت بەهەڵبژاردن خسته‌روو

تۆڕی شەمس بۆ چاودێری هەڵبژاردن، ڕاپۆرتی بەرایی خۆی تایبەت بەهەڵبژاردنی پەرلەمانی كوردستان كە رۆژی 30ی ئەیلول بەڕێوەچوو، بڵاوكردەوە.

لەڕاپۆرتەكەی تۆڕی شەمس-دا، كە ئەمڕۆ 1ی تشرینی یەكەم، لە كۆنگرەیەكی رۆژنامه‌وانیدا لەلایەن هۆگر چەتۆ- لێپرسراوی تۆڕەكەوە خوێندرایەوە، باس لە خاڵە ئەرینێ و نەرێنییەكانی هەڵبژاردنی پەرلەمانی كوردستان كرا.

چەتۆ، لەخاڵە ئەرێنییەكانی هەڵبژاردندا باسی لەوەكرد كەبەشێوەیەكی گشتی لەكەشێكی ئارامدا بەڕێوەچووەو، لە زۆر لەبنكەكان، ژمارەیەكی زۆر بریكاری لایەنە سیاسییەكان و نوێنەری رێكخراوە ناوخۆیی و نێودەوڵەتییەكانی لێبووە.

چەتۆ، لەباسكردنی خاڵە نەرێنییەكانی هەڵبژاردندا كە لەڕاپۆرتەكەی تۆڕی شەمسدا، خاڵە نەرێنییەكانی هەڵبژاردنی خستە ڕوو كە بریتی بوون لە:  

یەكەم ـ جێبەجێنەكردنی یاسا و ڕێنماییەكانی كۆمسیۆن لەلایەن بەشێك لە فەرمانبەرانی كۆمسیۆن، بەهۆی لایەنداریی سیاسی یان نەبوونی شارەزایی.

دووەم ـ شكاندنی نهێنی دەنگدان و بوونی دیاردەی دەنگدانی بەكۆمەڵ و وێنەگرتنی پسوڵەی دەنگدان.

سێهەم ـ دروستكردنی فشار لەلایەن بەشێك لە بریكاری لایەنەكان و ئاسایش و موختارەكان بۆ سەر كارمەندانی كۆمسیۆن، بۆ ئەوەی لە ڕێكارەكان لابدەن، وەكو دەنگدانی دووبارە و دەنگدان بە بەڵگەنامەی ساختە.

چوارەم ـ بەردەوامی هەڵمەتی بانگەشە لە ناوە و دەرەوەی بنكەكان.

پێنجەم ـ بێبەشبوونی چەندین دەنگدەر لە دەنگدان بەهۆی گۆڕینی بنكەكانیان یاخود نەهاتنەوەی ناوەكانیان و تەمەنیان (دەنگدەی سەرو ٩٠ ساڵ، ناوەكەی سڕكرابوو).

شەشەم ـ دوورخستنەوەی بەشێك لە بریكاری لایەنەكان بەتایبەت لە قۆناغی دەنگدان و جیاكردنەوە و ژماردنی دەنگدەكان، لەگەڵ ڕێگری لە وێنەگرتنی فۆڕمی ژمارە ٥٣ ی تایبەت بەئەنجامی وێستگەكان.

هەر لە كۆنگرەیەدا، تۆڕی شەمس چوار ڕاسپاردەی ئاڕاستەی كۆمسیۆن كردووە، كە خۆی لە ئاشكراكردنی هەرچی زووتری ئەنجامەكان دەبینێتەوە، لەگەڵ بەدواداچوونی جدی بۆ سكاڵاكان و بەهەندوەرگرتنی پێشنیاز و تێبینی ڕێكخراوەكان و سزادانی ئەو كارمەندانی كەمتەرخەمبوون.

دوێنێ یەكشەممە (30ی ئەیلولی 2018) دەنگدانی گشتیی بۆ هەڵبژاردنی پەرلەمانی كوردستان بەڕێوەچوو.