ژماره‌ی ئه‌و كه‌سانه‌ی كه له پارێزگای هورمزگانی ئێران به‌هۆی خواردنه‌وه‌ی كحوولی ساخته‌وه گیانیان له‌ده‌ستداوه، بۆ ٢٣ كه‌س به‌رزبوویه‌وه.
فاتمه نه‌وروزیان، به‌ڕێوه‌به‌ری په‌یوه‌ندییه‌كان له نه‌خۆشخانه‌ی فێركاری كۆلێژی پزیشكیی هورمزگان، ، ئاماژه‌ی به‌وه‌كرد له رۆژی چوارشه‌ممه‌وه تا ئێستا 213 كه‌س له پارێزگاكه به‌هۆی كحوولی ساخته‌وه، ژه‌هراویبوون و بۆ نه‌خۆشخانه‌كان گوازراونه‌ته‌وه.
فاتمه نه‌وروزیان تیشكی خسته‌سه‌ر ئه‌وه‌ی 23 كه‌سی ژه‌هراویبوو، گیانیان له‌ده‌ستداوه و هه‌شت كه‌سی دیكه‌ش دۆخی ته‌ندروستییان ناجێگیره.
به‌پێی هه‌واڵێكی ئاژانسی ئیسنا، به‌ڕێوه‌به‌ری ئاسایشی پارێزگای هورمزگان، عه‌زیزوڵڵا مه‌له‌كی ئاشكرایكردووه له‌دوای رووداوه‌كه لێكۆڵینه‌وه‌كان ده‌ستیان پێكردووه و فرۆشیارانی خواردنه‌وه‌ی كحوولیی قاچاخ ده‌ستنیشانكراون.
عه‌زیزوڵڵا مه‌له‌كی باسی له‌وه‌شكردووه كه سێ كه‌سیان به تۆمه‌تی فرۆشتنی مادده‌ی كحوولی ساخته ده‌ستگیركردووه.
له ئێران فرۆشتنی مادده كحوولییه‌كان و به‌رهه‌مهێنانی له‌لایه‌ن موسڵمانانه‌وه قه‌ده‌غه‌یه و هه‌ربۆیه مادده كحوولییه‌كان له‌رێگه‌ی قاچاخه‌وه ده‌برێته ئه‌و وڵاته و به‌شێكیشی له ماڵه‌كاندا درووست ده‌كرێت.
به‌پێی یاساكانی ئێران، ئه‌و كه‌سانه‌ی كه خواردنه‌وه‌ی كحوولیی ده‌خۆنه‌وه، ده‌یكڕن یان ده‌یفرۆشن، به‌ره‌وڕووی سزای زیندانییكردن و جه‌ڵد لێدان ده‌كرێنه‌وه.
کۆمێنت (0)
تا ئێستا هیچ کۆمێنتێک نەکراوە.