لەشاری لەندەن ئاهەنگی ساڵانەی فیفا بەڕێوەچوو بۆ دەست نیشانكردنی باشترینەكانی ساڵی 2018 ، چەندی خەڵات دابەشكرا ، سەرەتا پێش ئەوەی باسی تێبینیەكان بكەم من لەكاتی ستۆدیۆی مۆندیالی 2018 لە روسیا لە كوردستان سپۆرت و كەناڵەكانی دیكە رامگەیاند كە لوكا مۆدریچ بەو ئاستەی كە لەمۆندیال پێشكەشی كرد دەبێتە خاوەن خەڵاتی باشترین یاریزانی جیهان كە بە (زە بێست) ناسراوە ، پێشبینیەكەشم هاتە دی ، بەڵام لەگەڵ ئەوشدا چەند تێبینیەك لەسەر خەڵاتەكان هەبوو :
* خەڵاتی جوانترین گۆڵ كەبەخەڵاتی پوشكاش ناسراوە درا بە یاریزانی میسری محەمەد سەلاح كە گۆڵەكەی لە دێربی میرسیساید بەرامبەر ئیڤەرتۆن بەجوانترین گۆڵ دەست نیشانكرا ، راستە گۆڵەكە جوان بوو بەڵام بەهیچ شێوەیەك ناگاتە جوانی گۆڵەكەی كریستیانۆ رۆناڵدۆ لە یۆڤانتس یان گۆڵەكەی گاریس بێل لەیاری كۆتایی چامپیۆنزلیگ لەبەرامبەر لیڤەرپول ، هەروەها ئەم دوو گۆڵە لە رووی گرنگیەوە زۆر بەنرختربوون لەگۆڵەكەی سەلاح بەڵام وادیارە هاندەرانی میسری دەنگێكی زۆریان بە گۆڵەكەی سەلاح داوە لەهەمان كاتدا رازیكردنی سەلاح كە خەڵاتی زە بێستی نەبردەوە .
* ئامادەنەبوونی كریستیانۆ ئاماژەیەكی بەهێزە كە یاریزانەكان پێشتر ئەنجامەكە دەزانن و چەندین ساڵە ئەم سیناریۆیە دووبارە دەبێتەوە .
* سەیرە گۆڵپارێزێك خەڵاتی باشترینی جیهان وەربگرێت كە كورتوای بەلژیكیە ناوی لە پێكهاتەی ساڵ دانەبێت لەهەمان كاتدا گۆڵپارێزێك كەناوی لە پاڵێوراوانی باشترین سێ گۆڵپارێز نەبوو لەپێكهاتەی ساڵ بێت كەئەویش دی خیای ئیسپانیە .
* سەیرە دانیال ئەلڤێس لە پێكهاتەی ساڵ بێت هەرچەندە نزیكەی 5 مانگە تووشی پێكان هاتووە و بەشداری مۆندیالی نەكردووە .
* جارێكی دیكە سەیرە محەمەد سەلاح ناوی لە سێ باشترین یاریزانی جیهانە بەڵام ناوی لە پێكهاتەی ساڵ نیە .
* هەموومان دەزانین كە كریستیانۆ هێرشبەر و سەری رم نیە چ لەیانەكانی ریال و یۆڤانتس یان لەهەڵبژاردەی پورتوگال بەڵام لە پێكهاتەی ساڵ بە تاكە هێرشبەر دیاریكراوە ئەوە چ پێوەرێكە !!!
بە بۆچوونی خۆم چۆنیەتی دەست نیشانكردنی باشترینەكان لەلایەن فیفاوە پێویستی بە رێنمایی و بنەمای روون و ئاشكرا هەیە ئەگینا بەردەوام تووشی رەخنە دێت و یاریزانەكان گلەیی لێدەكەن یان بایكۆتی دەكەن ، رەخنەكانی ئەنتوان گریزمان كەورەترین بەڵگەیە لەسەر ئەوەی جۆرە ناعەدالەتیەك هەیە هەروەك چۆن لەساڵانی رابردووش هەمان ناعەدالەتی هەبوو .
سالار جەلال
کۆمێنت (0)
تا ئێستا هیچ کۆمێنتێک نەکراوە.