ئه‌مڕۆ به‌سه‌رپه‌رشتی كه‌ریم شنگالی وه‌زیری ناوخۆ و پێشمه‌رگه به‌وه‌كاله‌ت و به ئاماده‌بوونی سه‌ربه‌ست له‌زگین بریكاری وه‌زاره‌ت و فه‌ریق جه‌بار یاوه‌ر ئه‌مینداری گشتی و فه‌ریق جه‌مال محه‌مه‌د سه‌رۆكی ئه‌ركانی وه‌زاره‌تی پێشمه‌رگه و ژماریه‌ك له ئه‌فسه‌رانی پله باڵای وه‌زاره‌ت و نوێنه‌رانی وڵاتانی هاوپه‌یمانان، كۆبوونه‌وه‌ی ده‌وری هاوپه‌یمانی نێوده‌وڵه‌تی دژ به تیرۆرستانی داعش له هه‌ولێر به‌ڕێوه‌چوو.
له‌و كۆبوونه‌وه‌یه راپۆرته‌كانی ژووری ئۆپه‌راسیۆنی هاوبه‌ش و هه‌واڵگری پێشكه‌شكران و ئامار و داتای رووداوه‌كانی چه‌ند رۆژی رابردوو له‌ناوچه جیاجیاكان خرایه‌ڕوو، هه‌روه‌ها تیشكخرایه سه‌ر جموجۆڵی چه‌كدارانی داعش له چه‌ند ناوچه‌یه‌ك و پارێزگایه‌كی عێراق به‌تایبه‌تی له به‌غدا و كه‌ركووك و نه‌ینه‌وا.
دواتر له‌لایه‌ن نوێنه‌ری هێزه‌كانی هاوپه‌یمان باس له رووداو و پێشهاته‌كانی سووریا له رووی ئه‌منی و ئۆپه‌راسیۆنه‌كان بۆ پاككردنه‌وه‌ی ناوچه‌كانی ژێر ده‌سه‌ڵاتی داعش كرا و زانیاری پێویست خرایه‌ڕوو.
هه‌ر له‌و كۆبوونه‌وه‌یه له‌لایه‌ن به‌رپرسانی كه‌ی تی سی سی له هاوپه‌یمانان و به‌ڕێوه‌به‌رایه‌تی مه‌شقی وه‌زارتی پێشمه‌رگه جه‌خت له‌سه‌ر گرنگی و بایه‌خی بنكه‌كانی مه‌شق كرایه‌وه، بۆ زیاتر راهێنان و پته‌وكردنی هێزه‌كانی پێشمه‌رگه‌ی كوردستان.
هه‌روه‌ها پێگه‌یاندنی راهێنه‌رانی ناوخۆی سه‌ربازی به پێویسن زاندرا، بۆ ئه‌وه‌ی له داهاتوو هێزه‌كانی پێشمه‌رگه پشت به‌خۆیان ببه‌ستێت.
له‌وباریه‌وه وه‌زیری پێشمه‌رگه به‌وه‌كاله‌ت به‌رده‌وامی مه‌شق و راهێنان و پێگه‌یاندنی راهێنه‌ری ناوخۆی به‌گرنگ و پێویست زانی و ته‌ئكیدی له‌سه‌ر پابه‌ندبوونی ئه‌فسه‌رانی به‌شداربووی له خوله‌كانی مه‌شق و راهێنانه‌كان كرده‌وه كه له‌كاتی ئێستا له‌لایه‌ن هاوپه‌یمانان و وه‌زارتی پێشمه‌رگه‌وه به‌ڕێوه‌ده‌چێت.
کۆمێنت (0)
تا ئێستا هیچ کۆمێنتێک نەکراوە.