فوئاد مه‌عسوم سەرۆک کۆماری عێراق لە ڕاگەیاندراوێکدا، داوا له كاربه‌ده‌ستانی ئه‌منیی ده‌كات هه‌رچی زووه به لێپرسراویه‌تییه‌وه لێكۆڵینه‌وه بكه‌ن له كوژرانی خۆپیشانده‌رانى به‌سره.
ئەوەشی خستۆتەڕوو " پێویستە حكومه‌تی خۆجێی له پارێزگاكه و حكومه‌تی فیدڕاڵیش كاری جدیی و به‌په‌له بكه‌ن بۆ به‌ده‌نگه‌وه چونی داواكاریەکانی خۆپیشانده‌ران و گرتنه‌به‌ری هه‌نگاوی به‌په‌له و عه‌مه‌لیی بۆ چاككردنی خزمه‌تگوزارییه‌كان، به تایبه‌تیی كاره‌با و ئاو و خزمه‌تگوزاریه گشتییه‌كان و چاره‌سه‌ركردنی كۆسپه‌كان كه هاوڵاتییان له ناوچه جیا جیاكانی پارێزگاكه‌دا به‌ده‌ستییه‌وه ده‌ناڵێنن".
ئەوەشی باس کردووە" هه‌وڵی جدی ده‌ده‌ین بۆ چاره‌سه‌ركردنی كێشه‌كانی خزمه‌تگوزاری و ئابووری شاری به‌سره، چاره‌سه‌ر كردنی دیارده‌كانی گه‌نده‌ڵیی و بێ ئومێدیی له هه‌موو بواره‌كاندا.
پاش نیوەڕۆى دوێنێ هەزاران خۆپیشاندەر لەبەردەم بیناى پارێزگاى بەسرەدا گردبوونەوە لە بەرامبەر هێزە ئەمنییەکانى عێراقدا کە فیشەک و بۆمبى فرمێسکڕێژیان دژبە خۆپیشاندەران بەکارهێنابوو. دواتر خۆپیشاندەران بیناى بەڕێوەبەرایەتییەکانی سەربە پارێزگای بەسرەیان سوتاند.
زیاتر لە دوو مانگە لە بەسرە و چەند شارێکى باشورى عێراق خۆپیشاندان بەڕێوەدەچێت و خۆپیشاندەران داواى باشکردنى خزمەتگوزارییەکان و کۆتاییهێنان بە گەندەڵى و بێکارى دەکەن لە وڵاتدا.
کۆمێنت (0)
تا ئێستا هیچ کۆمێنتێک نەکراوە.