مه‌رجه‌عی باڵای شیعه له عێراق، ره‌خنه له حكوومه‌ت ده‌گرێت و ده‌ڵێت" تا ئێستا نه‌یتوانیوه كێشه‌ی ئاو چاره‌سه‌ر بكات.
عه‌بدولمه‌هدی كه‌ربه‌لایی، نوێنه‌ری مه‌رجه‌عی باڵای ئاینی شیعه له عێراق، له وتاری نوێژی هه‌یندا له نه‌جه‌ف ڕایگه‌یاند" تائێستا حكوومه‌تی عێراق نه‌یتوانیوه كێشه‌ی ئاو چاره‌سه‌ر بكات، بۆیه ده‌بینین كه‌می ئاو وای كردووه، دانیشتوانی پارێزگای به‌سره نه‌توانن ئاوی خواردنه‌وه‌یان ده‌ست بكه‌وێت، ئه‌مه وێرای ئه‌وه‌ی كه به هۆی پیسبوونی ئاوی خواردنه‌وه، نه‌خۆشی پێست له‌و پارێزگایه بڵاوبووه‌ته.
وتیشی" ئه‌و هه‌وڵانه‌ی كه بۆ چاره‌سه‌ركردنی ئه‌و كێشه‌یه خراوه‌نه‌ته‌گه‌ڕ، وه‌ك پێویست نییه‌و، زۆر به‌داخه‌وه لایه‌نه په‌یوه‌نداره‌كانی حكوومه‌ت، وه‌ك پێویست هیچ گرنگی به‌م قه‌یرانه مرۆییه ناده‌ن.
ئه‌مه له‌كاتێكدایه كه له‌چه‌ند ڕۆژی رابردوودا به هۆی پیسبوونی ئاوی خواردنه‌وه، ژماره‌یه‌كی زۆر له دانیشتوانی پارێزگای به‌سره ژه‌هراوی بوون.
کۆمێنت (0)
تا ئێستا هیچ کۆمێنتێک نەکراوە.