محه‌مه‌دى حاجى مه‌حمود سكرتێری حزبی سۆسیالیستى دیموكراتى كوردستان له‌په‌یامێکدا به‌بۆنه‌ى یادی 16 ى ئاب و 72 ساڵه‌ى دامه‌زراندنى پارتى دیموكراتى كوردستان ، پیرۆزبایى له سه‌رۆك مه‌سعود بارزانى و مه‌کته‌بى سیاسى پارتى دیموکراتى کوردستان ده‌کات ، ئه‌مه‌ش ده‌قى پیرۆزباییه‌كه‌ى سكرتێری حزبی سۆسیالیستی دیموكراتى كوردستانه :
براى به‌ڕێز جه‌نابى کاک مه‌سعود بارزانى
به‌ڕێزان ئه‌ندامانى مه‌کته‌بى سیاسى پارتى دیموکراتى کوردستان
به بۆنه‌ى ساڵڕۆژى دامه‌زراندنى پارتى دیموکراتى کوردستانى تێکۆشه‌ره‌وه ، گه‌رمترین پیرۆزبایى ئاراسته‌ى ئێوه و له رێگه‌ى به‌رێزیشتانه‌وه پیرۆزبایى له ئه‌ندام و لایه‌نگرانتان ده‌که‌م
به ھیوام پارته خه‌باتگێره‌که‌تان ھه‌رده‌م له پێشکه‌وتن و سه‌رکه‌وتن دا بێت له پێناو پاراستنى ده‌ستکه‌وته‌کانى گه‌له‌که‌ماندا.
پارتى دیموکراتى کوردستان مێژوویه‌کى پرشنگدارى ھه‌یه له خه‌باتى ڕزگاریخوازى گه‌له‌که‌ماندا و به درێژایى مێژووى دامه‌زراندنى تا ئێستا ڕۆڵى به‌رچاوى ھه‌بووه له قۆناغه جیاوازه‌کاندا بۆ گه‌یشتن به مافه‌کانى گه‌لى کوردستان و له‌و پێناوه‌شدا شه‌ھید و قوربانى زۆریداوه .
ھه‌روه‌ھا ڕۆڵى به‌رێز کاک مه‌سعود بارزانى وه‌ک تێکۆشه‌ر و پێشمه‌رگه و سه‌رکرده‌یه‌ک له به‌شداریى خه‌باتى پرشگندارى گه‌له‌که‌مانتان و ئاماده‌یى له سه‌نگه‌ره‌کانى پێشه‌وه‌ى به‌رگریدا جێگاى ڕێزه و نموونه‌یه‌کى به‌رزى وه‌فادارى و دڵسۆزییه بۆ گه‌لى کوردستان و لاپه‌ره‌کانى مێژوو به شانازییه‌وه سه‌روه‌رییه‌کانى تۆمار ده‌که‌ن .
یادى دامه‌زراندنى پارتى دیموکراتى کوردستان له ھه‌لومه‌رجێکى گرنگ و چاره‌نوس سازدایه پێویسته ھه‌وڵه‌کان یه‌کبخرێن بۆ مامه‌ڵه کردن له‌گه‌ڵ ھه‌موو پێشھاته‌کان
دڵنیام پارتى دیموکراتى کوردستان وه‌ک ھێزێکى گرنگ له ئاست ئه‌م بارودۆخه‌دا به گیانى لێپرسراوانه مامه‌ڵه ده‌کات بۆ تێپه‌ڕاندنى قه‌یرانه‌کان و گه‌یاندنى وڵاته‌که‌مان به که‌نارێکى ھێمن و ئارام و خۆشگوزه‌رانى بۆ خه‌ڵکى کوردستان .
یادى دامه‌زراندنى پارته تێکۆشه‌ره‌که‌تان پیرۆزبێت و ھیوادارم به خه‌بات و ھه‌وڵ و
کۆششى ھه‌موو لایه‌ک بگه‌ین به دوا ئاوات و ماف و ویسته‌کانى گه‌له‌که‌مان
له‌گه‌ڵ ڕێزماندا
براتان
محه‌مه‌دى حاجى مه‌حمود
کۆمێنت (0)
تا ئێستا هیچ کۆمێنتێک نەکراوە.