ئاژانسی فه‌رمی هه‌واڵیی میسر بڵاویكرده‌وه، هێزه ئه‌منییه‌كان له میانی ئۆپه‌راسیۆنێكدا له پارێزگای سینا باكووری رۆژهه‌ڵاتی ئه‌و وڵاته، 12 چه‌كداریان كوشتووه.
ئاماژه‌ی به‌وه‌ش داوه كه كوژرانی ئه‌و ژماره چه‌كداره له میانی ئۆپه‌راسیۆنێكدا بووه كه بۆ سه‌ر حه‌شارگه‌یه‌كی تیرۆریستان له شاری عه‌ریش باكووری سینا ئه‌نجامدراوه.
بڵاویشیكردووه‌ته‌وه دوای رێوشوینی یاسایی و هه‌ماهه‌نگی له‌گه‌ڵ ده‌زگا ئه‌منییه په‌یوه‌ندیداره‌كان بۆ به ئامانجكردنی چه‌كداران، هێزه ئه‌منییه‌كان له لایه‌ن چه‌كدارانه‌وه ته‌قه‌یان لێكراوه.
راشیگه‌یاندووه كه له لایه‌ن خۆیانه‌وه هێزه ئه‌منییه‌كان وه‌ڵامی چه‌كدارانیان داوه‌ته‌وه و له ئاكامدا، 12 چه‌كدار كوژراون به‌بێ ئه‌وه‌ی ورده‌كاری زیاتر بخاته‌ڕوو.
له مانگی شوباتی رابردوو سوپای میسر ده‌ستپێكردنی ئۆپه‌راسیۆنێكی دژ به گرووپه چه‌كداره‌كان له سینا و ژماره‌یه‌ك ناوچه‌ی دیكه‌ی ئه‌و وڵاته راگه‌یاند كه تا ئه‌مڕۆ به‌رده‌وامه.
کۆمێنت (0)
تا ئێستا هیچ کۆمێنتێک نەکراوە.