رۆسنه‌فت پرۆژه‌کانی له‌ هه‌رێمی کوردستان ده‌ست پێده‌کات

رۆسنێفت، گەورە کۆمپانیای نەوتی رووسیا ئەمڕۆ سێشەممە رایگەیاند، پلانی هەیە تاوەکو کۆتایی ئەمساڵ دەست بە پڕۆژەکانی لە هەرێمی کوردستان بکات.

كۆمپانیای رۆسنه‌فتی گه‌وره‌ به‌رهه‌مهێنه‌ری نه‌وتی رووسی رایگه‌یاند: ده‌ستی به‌ پلاندانان كردووه‌ بۆ ئه‌وه‌ی له‌ كۆتایی ساڵی 2018ـدا ده‌ست به‌ پرۆژه‌ نه‌وتییه‌كانی له‌ هه‌رێمی كوردستان بكات.

به‌گوێره‌ی هه‌واڵێكی رۆیته‌ر، نوێنه‌ری كۆمپانیای رۆسنه‌فت گوتوویه‌تی: شاندێكی كۆمپانیاكه‌ له‌گه‌ڵ ده‌سه‌ڵاتدارانی هه‌رێمی كوردستان له‌ پارێزگای دهۆك باسی ئه‌و هه‌نگاوه‌ پێویستانه‌یان كردووه‌ كه‌ ده‌بێته‌ ده‌ستپێكی جێبه‌جێكردنی ریككه‌وتنه‌كه‌ی مانگی ئۆكتۆبه‌ری ساڵی 2017ـی نێوانیان.

هه‌روه‌ها گوتوویه‌تی: پێشبینی ده‌كه‌ین پێش كۆتایی ئه‌مساڵ، ده‌ست به‌جێبه‌جێكردنی پرۆژه‌ نه‌وتییه‌كانمان بكه‌ین.

كۆمپانیا زه‌به‌لاحه‌ رووسییه‌كه‌ له‌گه‌ڵ حكوومه‌تی هه‌رێمی كوردستان رێككه‌وتووه‌، له‌ 5 ناوچه‌ی هه‌رێمی كوردستان ده‌ست به‌ كنه‌ و پشكنینی جیۆلۆجی بكه‌ن. ئه‌گه‌ر سه‌ركه‌وتوویش بوون، ساڵی 2021 ده‌ست به‌ به‌رهه‌مهێنانی ده‌كه‌ن.

به‌گوێره‌ی زانیارییه‌كانی كۆمپانیا رووسییه‌كه‌ "رۆسنه‌فت بڕی 400 ملیۆن دۆلار بۆ وه‌به‌رهێنان له‌و پێنج ناوچه‌ نه‌وتییه‌ ده‌دات و دواتر نیوه‌ی ئه‌و بڕه‌ی له‌ به‌رهه‌مه‌كانی ئه‌و كێڵگانه‌ ده‌درێته‌وه‌.

قه‌باره‌ی پشكی كۆمپانیا رووسیه‌كه‌یش، به‌گوێره‌ی رێككه‌وتنی دابه‌شكردنی به‌رهه‌مه‌كان ده‌گاته‌ نزیكه‌ی 80%.