مەحموود محەممەد: پارتی مافی خۆیه‌تى پۆستی سه‌رۆک کۆمار دیاری بکات و شایسته‌ی ئه‌وه‌یه‌ پۆسته‌که‌ وه‌ربگرێت

ئه‌مڕۆ شه‌ممه‌  7 ى ته‌موزی 2018 ، له‌شارۆچكه‌ى پیرمام به‌سه‌رپه‌رشتى سه‌رۆك مه‌سعود بارزانى ، كۆبوونه‌وه‌ی ئه‌نجومه‌نى سه‌ركردایه‌تى پارتى دیموكراتى كوردستان  به‌ڕێوه‌چوو 
 
دوای كۆبوونه‌وه‌كه‌ مه‌حمود محه‌مه‌د گوته‌بێژى پارتى دیموكراتى كوردستان له‌كۆنگره‌یه‌كى ڕۆژنامه‌وانیدا ڕایگه‌یاند ،  له‌كۆبوونه‌وه‌ى ئه‌نجومه‌نى سه‌ركردایه‌تى به‌سه‌رپه‌رشتى سه‌رۆك بارزانى  تاوتوێی  بارودۆخى ئێستای كوردستان و هه‌ڵبژاردنى ئه‌نجومه‌نى نوێنه‌رانى عێراق و هه‌ڵبژاردنی داهاتووی په‌رله‌مانی په‌رله‌مانى كوردستان كه‌بڕیاره‌ 30 ى 9 ى 2018 به‌ڕێوه‌بچێت  ته‌وه‌ره‌كانى نێو كۆبوونه‌وه‌كان بوون ،   له‌كۆبوونه‌وه‌كه‌ش په‌یوه‌ندى پارتى له‌گه‌ل لایه‌نه‌كانى ده‌ره‌وه‌ گفتوگۆی له‌سه‌ركرا ، جگه‌ له‌وه‌ى له‌ناوخۆی حزب بۆشایه‌ك هه‌بوو له‌مه‌كته‌بی سیاسی كه‌عارف ته‌یفور  شوێنه‌كه‌ى پڕكرده‌وه‌ 

گوته‌بێژى پارتى دیموكراتى كوردستان ڕاشیگه‌یاند ، له‌كۆبوونه‌وه‌ى ئه‌نجومه‌ن بڕیاردرا  ده‌ست به‌ئاماده‌كاریه‌كانى حزب بكرێت بۆ هه‌ڵبژاردنه‌كانى داهاتووی كوردستان 

مه‌حمود ڕاشیگه‌یاند ، هه‌رێمى كوردستان پێویستى به‌هه‌ڵبژاردن هه‌یه‌ و ده‌بێت ئه‌نجام بدرێت له‌پێناو ئه‌وه‌ی په‌رله‌مان كارابكرێت وه‌ببێته‌ چاره‌سه‌رێكى باش بۆ كێشه‌كان 

 گوته‌بێژى پارتى دیموكراتى كوردستان ڕاشیگه‌یاند ،  به‌شاندێكى هاوبه‌ش له‌گه‌ڵ یه‌كێتى  ده‌چینه‌ به‌غدا به‌به‌رنامه‌یه‌كى هاوبه‌شى نێوان هه‌ردوولا 

 
له‌به‌شێكى دیكه‌ى لێدوانه‌كانى مه‌حمود محه‌مه‌د له‌كۆنگره‌ ڕۆژنامه‌وانیه‌كه‌ ڕایگه‌یاند ،  گۆڕانكارییه‌كانى نێو پارتى  پێویستى به‌دیراسه‌ و به‌دوا داچوون هه‌یه‌ تا بزانین  له‌كوێدا گۆڕانكاری هه‌یه‌ و كێشه‌كان چین بۆیه‌ش ئه‌نجومه‌نى سه‌ركردایه‌تى  ده‌سه‌ڵاته‌كانی خۆی داوه‌ته‌ سه‌رۆك بارزانی و مه‌كته‌بی سیاسی.
 
 له‌باره‌ى پۆستى سه‌رۆك كۆماری عێراق مه‌حمود محه‌مه‌د ڕایگه‌یاند ، ئه‌مجاره‌ مافی پارتی دیموكراتى كوردستانه‌ پۆستی سه‌رۆك كۆمار دیاری بكات و شایسته‌ی ئه‌وه‌یه‌ پۆسته‌كه‌ وه‌ربگرێت.

شوان عه‌زیز