لیوا "تاریق نوری" به‌ڕێوه‌به‌ری ئاسایشی هه‌ولێر، له باره‌ی ته‌قینه‌وه‌ی كۆگایه‌كی چه‌ك و ته‌قه‌مه‌نی سه‌ر به هێزی پێشمه‌رگه به ده‌زگای سه‌ته‌لایتی كوردستانی ڕاگه‌یاند: به‌ره‌به‌یانی ئه‌مڕۆ كۆگایه‌كی چه‌ك و ته‌قه‌مه‌نی سه‌ر به فه‌رمانگه‌یه‌كی هێزی پێشمه‌رگه گڕی گرت و ته‌قییه‌وه.
ڕاشیگه‌یاند: به‌هۆی پابه‌ند نه‌بوون به بنه‌ماكانی چه‌ك هه‌ڵگرتن و خراپ دانانیان و به‌رزبوونه‌وه‌ی پله‌كانی گه‌رما كۆگایه‌كی هه‌ڵگرتنی چه‌ك له به‌حركه ته‌قیوه‌ته‌وه، كه خۆشبه‌ختانه هیچ زه‌ره‌ر و زیانێكی گیانی لێنه‌كه‌وتۆته‌وه و ته‌نیا زه‌ره‌ری ماددی هه‌بووه.
به‌ڕێوه‌به‌ری ئاسایشی هه‌ولێر ڕاشیگه‌یاند: هیچ ده‌ستێكی تیرۆر و ئه‌نقه‌ست له پشتی ته‌قینه‌وه‌ی كۆگاكه نه‌بووه و به‌ڵكو به‌هۆی خراپ عه‌مباركردنیان له ناو كۆگاكه‌دا و به‌رزبوونه‌وه‌ی پله‌كانی گه‌رما ئه‌م ڕووداوه ڕوویداوه.
گوتیشی: هه‌بوونی كۆگای چه‌ك هه‌ڵگرتن له ناو شاره‌كاندا دووره له بنه‌ماكانی به‌رگری شارستانی و پێویسته كۆگاكانی چه‌ك هه‌ڵگرتن له ده‌ره‌وه‌ی شاره‌كان بن و به باشی و به شێوه‌یه‌كی ڕێكوپێك عه‌مبار بكرێن تا رووداوی ئاوا نه‌خوازراوی لێنه‌كه‌وێته‌وه.
کۆمێنت (0)
تا ئێستا هیچ کۆمێنتێک نەکراوە.