فڕۆکه‌ جه‌نگییه‌کانی تورکیا له‌ بۆردومانکردنی ده‌ڤه‌ری سیده‌کان به‌رده‌وامن

فڕۆكه‌ جه‌نگییه‌كانی سوپای توركیا چه‌ند شوێنێكیان له‌ بناری چیای شه‌كیو بۆردمان كرد، كه‌ژماره‌یان چوار فڕۆكه‌ بوون دواتر به‌ره‌و بناری قه‌ندیل ڕویشتن.

په‌یامنێرمان مه‌هدی ئومێد پێی راگه‌یاندین: شه‌وی رابردوو فڕۆكه‌ جه‌نگییه‌كانی سوپای توركیا زۆر به‌نزمی به‌سه‌ر گوندو ئاوایی و شاروِچكه‌ی سیده‌كان دا سووڕانه‌وه‌ و به‌پێی سه‌رچاوه‌كان دوای ئه‌وه‌ی چه‌ند شوێنێكیان له‌ بناری چیای شه‌كیو بۆردمان كرد، فڕۆكه‌كان كه‌ژماره‌یان چوار فڕۆكه‌ بوون  به‌ره‌و بناری قه‌ندیل ڕویشتن.

له‌مباره‌یه‌وه‌، ئیحسان چه‌له‌بی، به‌ڕێوه‌به‌ری ناحیه‌ی سیده‌كان به‌كوردستان تیڤی ڕاگه‌یاند :ماوه‌یه‌كه‌ بۆردمانی سوپای توركیا به‌بیانوی هه‌بوونی بنكه‌و باره‌گاكانی پارتی كرێكارانی كوردستان( په‌كه‌كه‌) له‌ ناوچه‌كه‌ چڕتربوونه‌ته‌وه‌و به‌رده‌وام تۆپخانه‌و فڕۆكه‌و هیلیكۆپته‌ره‌ جه‌نگییه‌كان  ناوچه‌ سنوورییه‌كانی ده‌ڤه‌ری سیده‌كان بۆردمان ده‌كه‌ن .

هه‌روه‌ها ئاماژه‌ی به‌وه‌ش كرد بۆردومانه‌كان بوونه‌ته‌ مه‌ترسی و گرفت بۆ سه‌ر دانیشتووانی گوندو ئاواییه‌كان و ڕه‌وه‌ندو كۆچه‌رییه‌كانی ناوچه‌كه‌.

داڕشتنه‌وه‌ی: رزگار