وه‌زاره‌تى خوێندنى باڵا و توێژینه‌وه‌ى زانستى حكوومه‌تى هه‌رێمى كوردستان، له نووسراوێكدا كه گشتاندنى كردووه بۆ گشت زانكۆ و په‌یمانگە حكومی و تایبه‌ته‌كانى هه‌رێمى كوردستان، ڕێنماییه‌كى نوێی له‌باره‌ى ماوه‌ى مانه‌وه‌ى قوتابی له ده‌ره‌وه‌ى وڵات بڵاوكرده‌وه.
له نووسراوه‌كه‌ى وه‌زاره‌تى خوێندنى باڵا و توێژینه‌وه‌ى زانستى كه به ژماره 6193 له 9/5/2018 ده‌رچووه و وێنه‌یه‌كى ده‌ست مالپه‌رى كوردستان تیڤی كه‌وتووه، هاتووه" ئه‌و قوتابیانەی ده‌یانه‌وێت له ده‌ره‌وه‌ى وڵات درێژه به‌پڕۆسه‌ى خوێندن بده‌ن، پێویسته‌ى ماوه‌ى مانه‌ویان له وڵاتى خوێندندا بۆ خوێندنى دبلۆم و به‌كالۆریۆس بۆ هه‌ر ساڵێك 7 مانگ كه‌متر نه‌بێت".
هەر بەپێی نووسراوه‌كه: "بۆ خوێندنى ماسته‌ر پێویسته تێكڕاى مانه‌وه له وڵاتى خوێندن 9 مانگ كه‌متر نه‌بێت و بۆ خوێندنى دكتۆراش پێویسته 18 مانگ كه‌متر نه‌بێت".
له نووسراوه‌كه‌دا جه‌ختى له‌وه‌كراوه‌ته‌وه: "ئه‌م فه‌رمانه له ڕێكه‌وتى 1/9/2018 ه‌وه جێبه‌جێده‌كرێت و به‌پێچه‌وانه‌وه كه‌متر له‌ماوه‌ى دیاریكراوى سه‌ره‌وه بۆ هه‌ر ئاستێكى خوێندن به‌هیچ ڕێگایه‌ك یه‌كسانكردنى بڕوانامه‌ى بۆ ناكرێت".
کۆمێنت (0)
تا ئێستا هیچ کۆمێنتێک نەکراوە.