به‌ڕێوه‌به‌رایه‌تی پۆلیسی پارێزگایی سلێمانی له ڕاگه‌یه‌ندراوێكدا ڕایگه‌یاند: به‌شی پۆلیسی نه‌هێشتنی تاوانی سه‌ر به‌به‌ڕێوه‌به‌رایه‌تی پۆلیسی پارێزگای سلێمانی، كه‌سێكیان ده‌ستگیر كرد كه تۆمه‌تباره به‌دزینی بڕی 8200 دۆلاری پاره‌ی حه‌جی حاجییه‌ك.
ڕاشیگه‌یاندووه: پاش ئه‌وه‌ی هاوڵاتییه‌كی دانیشتوی شارۆچكه‌ی قه‌ڵادزێ، سه‌ردانی به‌رێوه‌به‌رایه‌تی حه‌ج‌و عومره‌ی سلێمانی ده‌كات‌و بری هه‌شت هه‌زارو 200 دۆلاری ئه‌مریكی پێده‌بێت له‌لایه‌ن كه‌سێكه‌وه ئه‌و بڕه پاره‌یه‌ی لێ ده‌دزرێت.
هه‌روه‌ها ڕاشیگه‌یاندووه: پاش كۆكردنه‌وه‌ی زانیاریی ورد، توانرا ئه‌مرۆ 2018/4/30، له‌چالاكییه‌كانی مه‌فره‌زه‌كانی به‌شی پۆلیسی نه‌هێشتنی تاوانی سه‌ر به‌به‌ڕێوه‌به‌رایه‌تی پۆلیسی پارێزگای سلێمانی، تۆمه‌تباره‌كه ده‌ستگیر بكرێت.
له ڕاگه‌یه‌ندراوه‌كه‌دا هاتووه: دوای ده‌ستبه‌سه‌ركردنی تۆمه‌تباره‌كه له‌به‌رده‌م دادوه‌ری لێكۆڵینه‌وه‌ی تاوان دانی به‌تاوانه‌كه‌یدا ناوه‌و له‌ئێستادا به‌فه‌رمانی دادوه‌ر به‌نده‌و لێكۆلینه‌وه‌كان به‌ده‌وامن.
کۆمێنت (0)
تا ئێستا هیچ کۆمێنتێک نەکراوە.