لە چەند ڕۆژی ڕابردوو شاندێكی سەربازی ئەمەریكا و بەریتانیا لەگەڵ بەرپرسانی وەزارەتی پێشمەرگەی حكوومەتی هەرێمی كوردستان كۆبوونەوە و تاوتوێی گەڕاندنەوەی هێزی پێشمەرگەی كوردستانیان بۆ ناوچە دابڕێنراوەكان كرد.
جەبار یاوەر ئەمینداری گشتیی وەزارەتی پێشمەرگەی حكوومەتی هەرێمی كوردستان ڕاگەیاند، كۆبوونەوەكان لەگەڵ شاندەكانی ئەمەریكا و بەریتانیا بەردەوام دەبێت لەبارەی پرسی گەڕاندنەوەی پێشمەرگە بۆ ناوچە دابڕێنراوەكانی هەرێم.
ئەمینداری گشتیی وەزارەتی پێشمەرگە، گوتی: ئەوان داوای گەڕانەوەی ھێزی پێشمەرگەیان بۆ ئەو ناوچانە کردووە لە عێراق، بەڵام تاوەکوو ئێستا ئەو لێک تێگەیشتنە دروست نەبووە، گوتیشی: گەڕانەوەی ھێزی پێشمەرگەی کوردستان زامنی پاراستنی ئەو ناوچانە دەکات لە دەستی داعش و پێشتر پێشمەرگە ئەو ئەزموونەی پیشان داوە.
ئەمینداری گشتیی وەزارەتی پێشمەرگەی حکوومەتی ھەرێمی کوردستان ڕاشی گەیاند، ھاوپەیمانیی نێودەوڵەتی پشتگیری لە گەڕانەوەی ھێزی پێشمەرگەی کوردستان بۆ ناوچە جێناکۆکەکان دەکات، گوتیشی: “لەگەڵ شاندێکی ھاوبەشی ئەمەریکا و بەریتانیا کۆ بوونەتەوە و یەکێک لە تەوەرەکانی ناو کۆبوونەوەکە، گەڕانەوەی ھێزی پێشمەرگە بووە بۆ ناوچە جێناکۆکەکان بە میکانیزمی پێش ساڵی 204 و ھاوپەیمانیی نێودەوڵەتییش پشتگیریی خۆی بۆ ئەو بڕیارە دەربڕیوە.
بەهۆی ڕووداوەكانی 16ی ئۆكتۆبەری ساڵی ڕابردوو كە میلیشیاكانی حەشدی شەعبی بە چاوساغی چەند كەسێكی ناو یەكێتی هێرشیان كردە سەر كەركووك و ناوچە دابڕێنراوەكان و داگیریان كرد، هێزی پێشمەرگەی كوردستان لەو سنوورانەدا كشاونەتەوە و ئێستا ئەمەریكا داوای گەڕانەوەیان دەكات.
کۆمێنت (0)
تا ئێستا هیچ کۆمێنتێک نەکراوە.