لیوا تاریق نوری، به‌رێوه‌به‌ری ئاسایشی هه‌ولێر تایبه‌ت به ماڵپه‌ری ده‌زگای سه‌ته‌لایتی كوردستانی راگه‌یاند: كه‌سانێكی لایه‌نه‌كان له ئاستی به‌رپرسیارییه‌تی گه‌وره‌دان له نێو حكومه‌ت و بۆ مه‌رامی تایبه‌تی خۆیان و حیزبه‌كانیان ده‌یانه‌وێت خۆپیشاندانی مامۆستایان به لارێدا به‌رن، كه ئه‌وه‌ش قابیلی قبوڵ كردن نییه.
هه‌روه‌ها گوتی: هیچ كه‌سێك له لایه‌ن هێزه‌كانی ئاسایشی هه‌ولێره‌وه ده‌ستگیر نه‌كراوه‌وه میدیاكانی لایه‌نگری ده‌ستگیر كراوان بۆ موزایه‌ده ناوی ئاسایش به‌كار ده‌هێنن، ئه‌وان له لایه‌ن هێزه‌كانی پۆلیسی چالاكیه مه‌ده‌نییه‌كانه‌وه ده‌ستگیر كراون و ده‌درێن به دادگا و دادوه‌ر حوكمیان به سه‌ردا ده‌رده‌كات، چونكه بێمۆڵه‌ت هاتوونه‌ته ناو خۆپیشانده‌ران و ویستوویانه خۆپیشاندانی مامۆستایان به‌لاڕێدا به‌رن و به دروشمه‌كانیان پشێوی و ئاڵۆزی له ناو خۆپیشانده‌راندا بڵاوبكه‌نه‌وه.
له باره‌ی ده‌ستگیر كردنی سه‌رۆكی فراكسیۆنی كۆمه‌ڵ له ئه‌نجوومه‌نی پارێزگای هه‌ولێر و دلێر حه‌سه‌ن ئه‌ندامی ئه‌نجوومه‌نى پارێزگای هه‌ولێر له فراكسیۆنی گۆڕان " لیوا عه‌بدولخالق ته‌ڵعه‌ت" به‌رێوه‌به‌ری پۆلیسی پارێزگای هه‌ولێر به ماڵپه‌ری ده‌زگای سه‌تلایتی كوردستانی راگه‌یاند: ئه‌وان به مه‌به‌ستی گێره‌شێوێنی و به لاڕێدا بردنی خۆپیشاندانی مامۆستایان هاتوونه‌ته ناو خۆپیشانده‌رانه‌وه ،ئه‌گینا كاری ئه‌وان له ناو ئه‌نجوومه‌نی پارێزگا دایه نه‌ك له ناو خۆپیشاندانی مامۆستایان.
کۆمێنت (0)
تا ئێستا هیچ کۆمێنتێک نەکراوە.