به‌هۆی تێكچوونی كه‌شوهه‌وای ئه‌هواز له پارێزگای خووزستان و زۆربوونی گه‌ردیله‌كان و ته‌پۆتۆزی له‌ڕاده‌به‌ده‌رو خۆڵبارینێكی زۆر ئه‌و شاره له حاڵه‌تێكی مه‌ترسیدار دایه و به‌رپرسانی فریاكه‌وتنه پزیشكییه‌كانی ئه‌و پارێزگایه‌ش باری نا ئاسایی و ئاماده‌باشییان راگه‌یاندووه.
ئاژانسه‌كانی هه‌واڵی ئێران بڵاویان كرده‌وه له دره‌نگانی شه‌وی رابردووه‌وه له شاری ئه‌هوازی پارێزگای خووزستان كه‌ش و هه‌وای ئه‌و شاره گۆڕانی به‌سه‌ردا هاتووه‌و به رێژه‌ی له %60 گه‌ردیله‌كانی تۆز زیادیان كردووه.
شه‌هریار عه‌سكه‌ری، به‌رپرسی په‌یوه‌ندییه گشتییه‌كانی ئیداره‌ی گشتیی ژینگه پارێزی خووزستان به ئاژانسه‌كانی هه‌واڵی راگه‌یاندووه: له كاتژمێر 12ی شه‌وی رابردووه‌وه ڕێژه‌ی گه‌ردیله‌كان له ئاسمانی ئه‌هواز به "8600" میكرۆگره‌م له مه‌تر سێجا گه‌یشتووه، كه ئه‌و رێژه به‌رزه‌ش كه‌شوهه‌وای ئه‌م شاره‌ی هه‌ستیار و مه‌ترسیدار كردووه.
راشیگه‌یاندووه: ڕێژه‌ی ئاسایی گه‌ردیله‌كان له هه‌وادا 150 میكۆگرام مه‌تر سێجایه، كه ئه‌م ڕێژه‌یه له ئه‌هواز له ئێستادا 60 به‌رامبه‌ری ڕێژه ئاساییه‌كه‌یه‌تی .
هه‌ر به‌هۆی ئه‌و بارگۆڕانه خێرایه‌ی كه‌ش و هه‌واوه به‌ڕێوه‌به‌ری گشتی فرۆكه‌خانه‌كانی ئه‌و پارێزگایه رایگه‌یاندووه: به هۆی بڵاوبوونه‌وه‌ی له‌ڕاده‌به‌ده‌ری گه‌ردیله‌كان له هه‌وادا هاتووچۆی فڕۆكه‌كان قه‌ده‌غه كراوه .
کۆمێنت (0)
تا ئێستا هیچ کۆمێنتێک نەکراوە.