له‌سه‌رتاسه‌رى جیهان زۆرێك له خه‌ڵكى ئاڵوده‌ى گه‌یمى كۆمپیوته‌ر و یارییه‌كانى ناو مۆبایل بوونه و كه‌م له ئێمه هه‌یه ناوى گه‌یمى باتڵفیڵد (Battle Field)ـى نه‌بیستبێت، ئه‌م گه‌یمه له‌لایه‌ن هه‌ردوو گه‌وره كۆمپانیاى جیهانى (EA) و (DICE) وه به‌رهه‌مدێت بۆ هه‌ر سێ سیسته‌مى ( Microsoft Windows,Play Station,Xbox One)، باتڵفیڵد به یه‌كێك له به‌ناوبانگترین و پڕفرۆشترین گه‌یمى جیهان داده‌نرێت.
میوزیك دانه‌رى كورد و هونه‌رمه‌ندى به‌توانا كارزان مه‌حمود یه‌كێكه له‌و پێنج دانه‌رانه‌ى كه میوزیكیان بۆ ئه‌م به‌رهه‌مه داناوه هه‌روه‌ها میوزیك دانه‌رى كورد كارزان مه‌حمود توانیویه‌تى جێگه ده‌ستى خۆى به شێوه‌یه‌كى زۆر پرۆفیشناڵانه بكاته‌وه و شان به شان له‌گه‌ل هه‌ریه‌ك له "یوهان سودیرگفیست، پاتریك ئه‌ندرین، فریدریك مۆله‌ر و جویڵ ئیركسون" كارى به‌رهه‌مهێنانى میوزیكى بۆ ئه‌م گه‌یمه جیهانیه كردووه.
كارزان مه‌حمود له‌دایك بووى ساڵى 1981ـه و له شارى سلێمانى هاتۆته دونیاوه و له ساڵى 2005 ڕێگاى تاراوگه‌ى گرت و نیشته‌جێى وڵاتى سویده.
هونه‌رمه‌ندى كورد كارزان له ساڵى 2007 ده‌ستى به خوێندنى میوزیك كرد له وڵاتى سوید له په‌یمانگاى (KMH) له شارى ستۆكهۆڵم و له ئێستادا زه‌مینه‌یه‌كى پته‌وى هه‌یه له میوزیكی نیشتمانى كوردى و میوزیكی هونه‌رى ئه‌وروپى و چه‌نده‌ها به‌رهه‌مى نایابى هه‌یه و دانه‌رى میوزیكى گۆرانى كوردیه وهه‌روه‌ها هه‌وڵیداوه به‌هه‌مه‌كانى خۆى زیاتر به‌ره‌و جیهانى بوون به‌رێت.
ئاماده‌كردن/ سیروان عه‌زیز
کۆمێنت (0)
تا ئێستا هیچ کۆمێنتێک نەکراوە.