وەزیری پێشووی دەرەوەی عێراق و ئەندامی مەكتەبی سیاسیی پارتی دیموكراتی كوردستان ئاشكرای كرد، نزیكبوونەوەی بەغدا و ڕیاز وەهمێكی ئەمەریكایە و واشنتن دەیەوێ بڕوا بەخۆی بێنێ كە بەغدا لە تاران دوور دەخاتەوە.
هۆشیار زێباری لە ئەكاونتی فەرمی خۆی لە تۆڕی كۆمەڵایەتی تویتەر بڵاوی كردەوە، كە لەیەك نزیكبوونەوەی عێراق و سعوودیە، پێوەستبوونێكی وەهمییە و ئەمەریكا دەیەوێ بڕوا بەخۆی بهێنێ، كە دەتوانێ عەبادی سەرۆك وەزیرانی عێراق لە ئێران و هەژموونی ئێران بەسەر عێراق دوور بخاتەوە.
ئەو قسانەی هۆشیار زێباری لە كاتێكدایە ئەمڕۆ یەكشەممه ئەنجوومەنی هاوئاهەنگی لە نێوان سعوودیە و عێراق ڕێككەوتننامەكەی لەلایەن عەبادی و شا سەلمانەوە واژووی لەسەر كرا، دوای ئەوەی ڕۆژی شەمه عەبادی بە یاوەری شاندێكی باڵا كە خۆی لە 10 وەزیر و 60 ڕاوێژكار دەبینێتەوە گەیشتە سعوودیە.
زۆر لە چاودێران ئەمە بە مەحاڵ دەزانن بەغدا جارێكی تر لە سعوودیە و وڵاتانی عەرەبی نزیك بێتەوە، ڕەنگە ئەمەریكا بتوانێ سەرۆك وەزیران لە سعوودیە نزیك بكاتەوە، بەڵام دەسەڵاتی ڕاستەقینە لە عێراق لە دەستی سەرۆك وەزیران نییە، بگرە میلیشیاكان سەر بە ئێرانن و مالیكی هەژموونی گەورەی بەسەر تەواوی جومگەكانی دەسەڵات هەیە، ئەمەریكا بە كێشكردنی سەرۆك وەزیران بۆ خۆی هیچی دەست ناكەوێت.
کۆمێنت (0)
تا ئێستا هیچ کۆمێنتێک نەکراوە.