ئه‌مڕۆ یەکشەممە 22-10-2017 لە شاری هەولێر حزب و لایه‌نه سیاسیه‌كانی هه‌رێمی كوردستان جگه له گۆڕان و كۆمه‌ڵ كۆبوونه‌وه .
دوای کۆبوونەوەکەش کۆنگرەیەکی رۆژنامەوانی هاوبەشیان سازکرد، مەحموود محەممەد گوته‌بێژی پارتی دیموكراتی كوردستان رایگه‌یاند: ده‌بێت به به‌رپرسیارێتییه‌وه مامه‌ڵه له‌گه‌ڵ قۆناغه‌كه‌دا بكه‌ین، چونكه دۆخه‌كه هه‌ستیاره.
گوتیشی: پێشتر ئه‌وه ڕاگه‌یاندرا كه خه‌ڵكی كوردستان و سه‌ركردایه‌تی سیاسی كوردستان دیالۆگێكی كراوه‌ی به‌رپرسانه‌ی بێمه‌رج ئه‌نجام بدرێت، چاوه‌ڕێی وه‌ڵامی ئه‌وانین تاوه‌كوو بزانین ئاماده‌ن بۆ گفتوگۆ یان نا، به‌ڵام ئه‌و مه‌رجانه‌ی ئه‌وان دیارییان كردووه، له‌وانه‌یه ئه‌م پرسه دوا بكه‌وێت.
دواتر سه‌عدی ئه‌حمه‌د پیره، گوته‌بێژ و ئه‌ندامی مه‌كته‌بی سیاسی یه‌كێتی رایگه‌یاند: له دوای ڕیفراندۆم هه‌ندێك سه‌رئێشه دروست بوو، كۆمه‌ڵێك قسه و قسه‌ڵۆكی لێ كه‌وتووه‌ته‌وه كه قابیلی وردبوونه‌وه و لێكۆلێنه‌وه‌ی وردن، به‌ڵام پێكه‌وه كاركردن بۆ به‌ره‌نگاربوونه‌وه‌ی ناحه‌زانمان له هه‌وڵه‌كانیان بۆ نكۆڵیكردن له مافه‌كانی خه‌ڵكی كوردستان، پێویسته پێكه‌وه بین.
گوتیشی: ناتوانین هیچ جۆره گفتوگۆیه‌ك به مه‌رجه‌وه قه‌بووڵ بكه‌ین، پێیان گوتین ئه‌و گفتوگۆیه‌ی نێوان هه‌ولێر بووه‌ته قوربانی نێوان شیعه‌كان له‌سه‌ر هه‌ڵبژاردن و بارودۆخی داهاتوو، ئه‌مجاره له‌وانه‌یه زیاتر حكوومه‌ت ئیداره‌ی گفتوگۆكان بدات.
هاوكات فه‌رهاد مه‌لا ساڵح، ئه‌ندامی مه‌كته‌بی سیاسی یه‌كگرتووی ئیسلامی كوردستان، گوتی: له‌سه‌ر یه‌كڕیزیی نێو ماڵی كورد به‌رده‌وام ده‌بین، له‌گه‌ڵ لایه‌نه‌كانی دیكه‌ش به گفتوگۆ به‌رده‌وام ده‌بین. ئه‌مڕۆ هه‌مووان كۆده‌نگ بووین كه سه‌ره‌ڕای یه‌كڕیزیمان، جه‌ختكردنه‌وه له‌سه‌ر یه‌ك ئیداره‌یی و دامه‌زراوه شه‌رعییه‌كان كرایه‌وه .
گوتیشی: ئێمه گفتوگۆمان ڕه‌ت نه‌كردووه‌ته‌وه و ڕه‌تیشی ناكه‌ینه‌وه، دوا ڕێگا ئه‌وه‌یه به دیاكۆگ و گفتوگۆ كێشه‌كانمان چاره‌سه‌ر بكه‌ین.
کۆمێنت (0)
تا ئێستا هیچ کۆمێنتێک نەکراوە.