ئاژانسی رۆیته‌رز بڵاوى كردووه‌ته‌وه گه‌وره كۆمپانیاى نه‌وتى رووسى رۆزنه‌فت وه‌به‌رهێنان له 5 كێڵگه‌ى وزه‌دا ده‌كات له كوردستان، هه‌روه‌ها ده‌سه‌ڵاته‌كانى فراوانتر ده‌كات به‌به‌راوورد به پێش ریفراندۆم بۆ ئه‌وه‌ى گازى سروشتى هه‌رێمى كوردستان ببێته هاوكاری دابین كردنى بڕی پێویستی نه‌وت و گازى سروشتى بۆ توركیا و ئه‌وروپا.
ئاژانسی رۆیته‌رز زیاتر نووسیویه‌تى " ئێستا رۆزنه‌فت سه‌باره‌ت به وه‌به‌رهێنانى ده‌سه‌ڵاته‌كانى فراوانتر كردووه له پێش ریفراندۆمى سه‌ربه‌خۆیى و ره‌زامه‌ندى ده‌ربڕیوه بۆ ئه‌وه‌ى بۆڕى گازى سروشتى كوردستان ره‌وانه‌ى بازاڕه‌كانى توركیا و ئه‌وروپا بكات، دوو سه‌رچاوه به رۆیته‌رزى راگه‌یاندووه ئه‌و رێككه‌وتنه به‌هاكه‌ى زیاتره له ملیارێك دۆلار.
رۆیته‌رز زیاتر نووسیویه‌تى كوردستان ئه‌گه‌رچى خاوه‌نى یه‌ده‌گێكى گازى سروشتى زۆره ، به‌ڵام تاوه‌كو ئێستا گازى سروشتى هه‌نارده نه‌كردووه و رۆزنه‌فتیش كۆمپانیایه‌كى گه‌وره و باوه‌ڕ پێكراوه و ویستێكى زۆرى بۆ وه‌به‌رهێنانى گازى سروشتى هه‌یه له كوردستان.
زیاتر زانیارى هاتووه و نووسراوه بۆڕى گازى سروشتى كوردستان تواناى هه‌نارده‌كردنى بڕى 30 ملیار مه‌تر سێجا گازى سروشتى هه‌یه له ساڵێدا، هه‌روه‌ها ساڵى 2019 ته‌نیا پێویستى ناوخۆى كوردستانى پێ پڕده‌كرێته‌وه و ساڵى 2020 ره‌وانه‌ى بازاڕه‌كانى توركیا و ئه‌وروپا ده‌كرێت.
رۆزنه‌فت هه‌روه‌ها له دواى جێبه‌جێ كردنى ئه‌و پڕۆژه‌یه ده‌یه‌وێت رۆڵێكى زۆرى هه‌بێت كه به شێوه‌یه‌كى به‌رفراوان نه‌وتى كوردستان هه‌نارده بكات و گه‌شه بدات به كاره‌كانى له 5 كێڵگه نه‌وتییه‌كانى ژێر ده‌سه‌ڵاتى به‌پێى رێككه‌تنه‌كه‌ى له‌گه‌ڵ وه‌زاره‌تى سامانه سروشتییه‌كان.
حكومه‌تى هه‌رێمى كوردستان و رۆزنه‌فت كۆتایى یان به پشكنین و خوێندنه‌وه هێناوه و بۆ هه‌نارده‌كردنى نه‌وت و گازى كوردستان ، رۆزنه‌فت زیاتر له بڵاوكراوه‌كه‌دا وتویه‌تى، له ئایینده‌یه‌كى نزیكدا و به‌شێوه‌یه‌كى خێرا پڕۆژه‌كان جێبه‌جێ ده‌كه‌ین.
ئاژانسی رۆیته‌رز نووسیویشیه‌تى " رۆزنه‌فت ئاماده‌یى خۆى بۆ كوردستان ده‌ربڕیوه بۆ هاوكارى كردنى سه‌باره‌ت به بردنى بۆڕی نه‌وت و گاز بۆ ده‌ره‌وه‌ى كوردستان.
ئارام كاكه‌خان
کۆمێنت (0)
تا ئێستا هیچ کۆمێنتێک نەکراوە.