بڕیارە کاتژمێر 4:30ی پاشنیوەڕۆی ئەمڕۆ دووشەممە 24ی ئاب، مەراسیمی ماتەمینیی چلەی کۆچکردوو مزەفەر هەرکی، کارگێڕی لقی 16ی پارتی دیموکراتی کوردستان لە شاری هەولێر بەڕێوە بچێت.
ئەم مەراسیمە لە هۆڵی مەکتەبی ڕێکخستنی پارێزگای هەولێر ئەنجام دەدرێت و چاوەڕوان دەکرێت ژمارەیەک لە کەسایەتییە باڵاکانی حیزبی و حکوومی تێیدا ئامادە بن.
لە مەراسیمەکەدا سیداد بارزانی، وەک نوێنەری سەرۆک بارزانی، ئامادە دەبێت، هاوکات د. پشتیوان سادق، بەرپرسی مەکتەبی ڕێکخستن و ئاری نانەکەلی، بەرپرسی لقی 16ی هەولێر و خانەوادەی کۆچکردوو بەشداری تێدا دەکەن. بڕیارە لە میانی مەراسیمەکەدا تیشک بخرێتە سەر کاروانە خەباتی مزەفەر هەرکی وەک کادیرێکی چالاک و دڵسۆزی پارتی کە ساڵانێکی زۆر لە سنووری پارێزگای هەولێر خزمەتی کردووە.
پارتی دیموکراتی کوردستان وەک گەورەترین حیزبی هەرێمی کوردستان، بایەخێکی زۆر بە بەرزڕاگرتنی یادی ئەو کادیر و بەرپرسانە دەدات کە لە قۆناغە جیاوازەکاندا ڕۆڵی دیاریان هەبووە. مزەفەر هەرکی کە وەک یەکێک لە کەسایەتییە ناسراوەکانی ناو ڕێکخستنەکانی لقی 16ی هەولێر دەناسرێت، کۆچکردنی وەک زیانێک بۆ کادیرانی ئەو دەڤەرە دەبینرێت، هەر بۆیە مەراسیمی چلەکەی بە ئامادەبوونی نوێنەرایەتیی ئاستی باڵای سەرکردایەتی بەڕێوە دەچێت.
کۆمێنت (0)
تا ئێستا هیچ کۆمێنتێک نەکراوە.