کۆنگرێسی ئەمریکا دەسەڵاتەکانی ترەمپی لە جەنگی ئێراندا سنوردار کرد

ئەنجومەنی نوێنەرانی ئەمریکا، ڕۆژی پێنجشەممە (23ی تەممووزی 2026)، بڕیارێکی بۆ سنووردارکردنی دەسەڵاتە سەربازییەکانی دۆناڵد ترەمپ لە شەڕی دژ بە ئێراندا پەسەند کرد. ئەم هەنگاوە وەک دووەم سەرکەوتنی نەیارانی شەڕ لە ناو کۆنگرێس دەبینرێت و نیشانەی نیگەرانییە قووڵەکانی هەردوو پارتی کۆماری و دیموکراتە لە پەرەسەندنی ململانێکان.

بڕیارەکە بە زۆرینەی 214 دەنگی بەڵێ  بەرامبەر بە 208 دەنگی نەخێر پەسەند کرا. ئەوەی جێی سەرنجە، چوار ئەندامی پارتی کۆماری لەگەڵ تەواوی فراکسیۆنی دیموکراتەکان دەنگیان بە بڕیارەکە دا. هەرچەندە ئەم بڕیارە زیاتر "هێماییە" و هێزی یاسایی نییە بۆ ناچارکردنی کۆشکی سپی، بەڵام پەیامێکی سیاسیی قورسە و نیشانی دەدات کە ترەمپ لە ناوخۆی کۆنگرێسدا ڕووبەڕووی فشارێکی توند بووەتەوە.

دوای ئەوەی لە چەند ڕۆژی ڕابردوودا سێ سەربازی ئەمریکی لە ناوچەکەدا کوژران، هەوڵەکانی دیموکراتەکان بۆ هێنانەدی ئەم بڕیارە چڕتر بوونەوە. نوێنەران "پرامیلا جایاپاڵ" و "جەیسۆن کرۆ" لە نامەیەکدا بۆ هاوکارەکانیان ڕایانگەیاند: "زۆر گرنگە کە ئێمە دەسەڵاتە دەستوورییەکانی خۆمان بەپێی ماددەی یەکەم بەکاربهێنین و ناڕەزایەتی کۆنگرێس دژی ئەم شەڕە نیشان بدەین، بەتایبەتی دوای دوایین پەرەسەندنە خوێناوییەکان لە ئێران."

هەرچەندە زۆرینەی کۆمارییەکان هێشتا پشتگیری لە هەڵمەتە سەربازییەکانی ترەمپ دەکەن، بەڵام نیگەرانی لەبارەی درێژەکێشانی شەڕەکە بەبێ ڕەزامەندیی فەرمیی کۆنگرێس لە هەڵکشاندایە. ئەم بڕیارە لە کاتێکدا دەردەچێت کە کۆمارییەکان لە ناو کۆنگرێس خەریکی کارکردنن بۆ تەرخانکردنی بڕی 73 ملیار دۆلار وەک بودجەی هاوکاری بۆ پڕۆسە سەربازییەکان لە ئێران.

نوێنەر "چێپ ڕۆی" لە پارتی کۆماری، کە دەنگی دژی بڕیارەکە دا، ئاماژەی بەوە کرد کە پێویستە کۆشک ی سپی بێتە ناو کۆنگرێس و بە ڕاشکاوی داوا بکات نەک فەرمان؛ ئەو وتی: "پێویستە وەڵامی ئەوە بدەنەوە کە ئایا دەمانەوێت لە شەڕدا بمێنینەوە لەگەڵ دەوڵەتێکی خاوەن سەروەری یان نا، پاشان گفتوگۆی لەسەر بکەین و بڕیار بدەین."

بڕیارە ئەنجومەنی پیرانی ئەمریکاش (سێنات) هەر ئەمڕۆ پێنجشەممە بڕیارێکی هاوشێوە بخاتە دەنگدانەوە، بەڵام پێشبینی دەکرێت لەوێ ڕێگایەکی سەختتر ببڕێت و بەهۆی زۆرینەی لایەنگرانی سەرۆکەوە، پەسەندکردنی کارێکی ئاسان نەبێت. ئەم جموجۆڵانەی کۆنگرێس ئاماژەیەکی ڕوونن بۆ ئەوەی کە شەڕی ئێران چیتر تەنها ململانێیەکی دەرەکی نییە، بەڵکو بووەتە کێشەیەکی ناوخۆیی گەورە لە واشنتۆن.