ئێران هێرشکردنە سەر پێشکەوتووترین سیستەمەکانی بەرگریی ئەمریکای لە ئوردن ڕاگەیاند

سوپای پاسداران ڕایگەیاند، سیستەمی بەرگریی "THAAD" و "Patriot"ـی ئەمریکامان لە ئوردن تێکشکاند.

ئەمڕۆ پێنجشەممە 23ـی تەمووز، سوپای پاسدارانی ئێران، ڕایگەیاند کە لە هێرشێکی نوێدا بۆ سەر هێزەکانی ئەمریکا لە ئوردن، توانیویانە زنجیرەیەک کەرەستەی سەربازی و سیستەمی بەرگریی پێشکەوتوو تێکبشکێنن.

بەپێی بەیاننامەیەکی فەرمیی سوپای پاسداران کە لە تەلەفزیۆنی فەرمیی ئێران بڵاوکرایەوە، ئامانجە تێکشکێندراوەکان بریتین لە:

1.  ڕادارێکی سەر بە سیستەمی بەرگریی مووشەکیی ئەمریکی لە جۆری "THAAD".

2.  سیستەمی بەرگریی ئاسمانیی "Patriot".

3.  ڕادارێکی جۆری "C-RAM".

4.  گەراجێکی تایبەت بە نیشتنەوە و مانەوەی هێلیکۆپتەرەکان.

ئەم هێرشانە لە چوارچێوەی پەرەسەندنی شەڕ و هێرشە پێچەوانەکانی نێوان واشنتن و تاران لە ناوچەی ڕۆژهەڵاتی ناوەڕاست ئەنجامدراون. تاران جەختی کردووەتەوە کە هێرشەکانی وەک وەڵامدانەوەیەک بۆ جووڵە سەربازییەکانی ئەمریکا بەردەوام دەبن.

تا ئێستا فەرماندەیی ناوەندیی هێزەکانی ئەمریکا (CENTCOM) یان حکوومەتی ئوردن، هیچ لێدوانێکی فەرمییان لەبارەی قەبارەی زیانەکانی ئەم هێرشە ڕانەگەیاندووە.