کێ دەبێتە شوێنگرەوەی لینزی گراهام

سەرەڕای ئەوەی دۆناڵد ترەمپ پاڵپشتی خۆی بۆ لین گراهام نۆردۆن دەربڕیوە بۆ پڕکردنەوەی کورسییەکەی کۆچکردوو لیندسی گراهام لە ئەنجوومەنی پیران، بەڵام دوو ئەندامە دیارەی کۆنگرێس هێشتا بەنیازی ڕکابەریکردنن و یەکلایی نەبووەتەوە بۆ هیچکامیان.

نانسی مەیس و ڕالف نۆرمان، دوو ئەندامی دیاری پارتی کۆماری لە ویلایەتی کارۆلینای باشوور، هێشتا بژاردەی خۆکاندیدکردنیان بۆ ئەنجوومەنی پیرانی ئەمریکا نەخستووەتە لاوە. ئەمە لە کاتێکدایە کە دۆناڵد ترەمپ، سەرۆکی ئەمریکا، بە فەرمی پاڵپشتی خۆی بۆ دارلین گراهام نۆردۆن ڕاگەیاندووە تاوەکو بۆ ماوەی 6 ساڵی تەواو ئەو کورسییە بگرنەدەست.

 چاودێرانی سیاسی پێیان وایە سووربوونی ئەم دوو بەرپرسە لەسەر کاندیدبوونیان، دەکرێت ببێتە هۆی دروستبوونی پشێوی و ململانێیەکی توند لە ناوخۆی پارتەکەدا لە کاتی هەڵبژاردنی بەرایی (Primary) کە بڕیارە لە 11ی ئابی 2026 بەڕێوەبچێت.

بەپێی زانیارییەکانی ماڵپەڕی "ئەکسیۆس" کە لە سەرچاوە نزیکەکان لە نانسی مەیس وەریگرتووە، ناوبراو هێشتا بیر لە خۆکاندیدکردن دەکاتەوە و یەکێک لە سەرچاوەکان ئاماژەی بەوە کردووە کە بۆ مەیس "هەڵەیەکی سیاسییە ئەگەر ئەو هەنگاوە نەنێت". لە لایەکی دیکەوە، ڕالف نۆرمان لە وەڵامی پرسیارێکدا سەبارەت بەوەی ئایا هێشتا بەنیازی کاندیدبوونە، بە کورتی و بە جۆش و خرۆشەوە وەڵامی داوەتەوە: "بەڵێ!!". ئەم دوانە پێشتر لە کێبڕکێی پۆستی پارێزگاری هەمان ویلایەتدا بەشدارییان کردبوو، بەڵام نەیانتوانی سەرکەوتن بەدەستبهێنن.

دۆناڵد ترەمپ ڕۆژی هەینی لە پۆستێکدا لە تۆڕی کۆمەڵایەتی "Truth Social" ئاشکرای کرد کە داوای لە دارلین گراهام نۆردۆن کردووە خۆی کاندید بکات. دارلین خوشکی سێناتۆری کۆچکردوو لیندسی گراهامە و پێشتریش لە لایەن پارێزگاری ویلایەتەکەوە دەستنیشان کرابوو بۆ ئەوەی تا کۆتاییهاتنی ماوەی یاسایی براکەی، ئەرکەکانی لە ئەنجوومەنی پیران ڕاپەڕێنێت.

 ترەمپ لە پۆستەکەیدا نووسیویەتی: "هیواخوام دارلین ئەم کارە بکات، چونکە هیچ کەس لەو شیاوتر نییە بۆ ڕێزگرتن لەو میراتەی کە لیندسی گراهامی برای بەجێی هێشتووە." هەرچەندە دارلین تا ئێستا بە فەرمی وەڵامی نەداوەتەوە، بەڵام ڕاپۆرتەکان ئاماژە بەوە دەکەن کە خەریکی ئامادەکارییە بۆ ڕاگەیاندنی کاندیدبوونی.

تەنها مەیس و نۆرمان نیین کە چاویان لەو کورسییە ستراتیژییەیە، لیستی کاندیدە ئەگەرەکان چەندین ناوی تری تێدایە، وەک ڕەسڵ فرای ئەندامی کۆنگرێس، پامیلا ئێڤێت جێگری پارێزگار، مارک لینچی بازرگان و مارک سانفۆردی ئەندامی پێشووی کۆنگرێس. سانفۆرد هەنگاوێکی کردەیی ناوە و بە فەرمی لای کۆمیسیۆنی هەڵبژاردنە فیدراڵییەکان، لێژنەی هەڵمەتی هەڵبژاردنی خۆی گۆڕیوە بۆ لێژنەی ئەنجومەنی پیران.

ئەم ئاڵۆزییە سیاسییە نیشانەی جەمسەرگیرییەکی نوێیە لە ناو پارتی کۆماری لە یەکێک لە گرنگترین ویلایەتەکانی ئەمریکا،هەڵبژاردنی بەرایی لە 11ی ئاب دەبێتە تاقیکردنەوەیەکی گەورە بۆ ئەوەی بزانرێت ئایا قسەی دۆناڵد ترەمپ وەک جاران لە ناو پارتەکەدا بڕیاردەر دەبێت، یان نەوەیەکی نوێ لە سیاسییە کۆمارییەکان دەیانەوێت بەبێ ڕەزامەندی ئەو، پێگەی خۆیان لە واشنتن بەهێز بکەن.