تۆم باراک، باڵیۆزی ئەمریکا لە تورکیا، ڕایگەیاند کە لە ژێر سەرکردایەتییە "بوێرەکەی" دۆناڵد ترەمپ، سەرۆکی ئەمریکا، کۆبوونەوەکەی ئەمڕۆ لەگەڵ عەلی زەیدی، سەرۆکوەزیرانی عێراق، وەک وەرچەرخانێکی مێژوویی لە پەیوەندییەکانی نێوان هەردوو وڵاتدا دەبینرێت.
باراک ئاماژەی بەوە کرد کە داهاتووی پەیوەندییەکانی واشنتن و بەغدا چیتر تەنها لە چوارچێوەی پرسە ئەمنییەکاندا نامێنێتەوە، بەڵکو دەچێتە قۆناغێکی نوێی وەبەرهێنان، بازرگانی و ڕەخساندنی دەرفەتی ئابووریی گەورە.
بەپێی وتەکانی باڵیۆزی ئەمریکا، عێراق بەهۆی پێگە جوگرافییەکەیەوە کە دەکەوێتە دڵی ڕۆژهەڵاتی ناوەڕاست، دەتوانێت ڕۆڵێکی بێوێنە بگێڕێت لە بەستنەوەی ناوچەکە بە وڵاتانی ئەنجوومەنی هاریکاریی کەنداو، تورکیا، سووریا، ئوردن، ئاسیای ناوەڕاست، باڵکان و ناوچەی قەوقاز. باراک تیشکی خستە سەر پڕۆژە ستراتیژییەکانی وەک ڕاکێشانی بۆریی نوێی وزە و بونیادنانی ڕێگای پێشکەوتوو، کە ئەمانەش نەک هەر دەبنە هۆی بوژانەوەی عێراق، بەڵکو دەرفەتی تایبەت و ناوازە بۆ کۆمپانیا و بزنسە ئەمریکییەکان دابین دەکەن تاوەکو لە بازاڕەکانی ناوچەکەدا کار بکەن.
ئەم لێدوانانەی باڵیۆزی ئەمریکا هاوکاتن لەگەڵ هەوڵەکانی ئیدارەی ترەمپ بۆ چەسپاندنی سەقامگیری لە ڕێگەی گەشەپێدانی ئابوورییەوە. باراک جەختی کردەوە کە عێراقێکی ئاوەدان و گەشەسەندوو بە واتای ناوچەیەکی سەقامگیرتر دێت، ئەمەش ئامانجێکی سەرەکیی حكوومەتی ئەمریکایە بۆ ساڵی 2026 و قۆناغەکانی دواتر، تاوەکو لە ڕێگەی هاوبەشیی ئابوورییەوە پەیوەندییەکانی لەگەڵ بەغدا بەهێزتر بکات و عێراق بکاتە پردێکی سەرەکی بۆ بازرگانیی نێودەوڵەتی.
کۆمێنت (0)
تا ئێستا هیچ کۆمێنتێک نەکراوە.