بانکی ناوەندیی عێراق بڕیاری دا بڕی ئەو دۆلارەی بە گەشتیاران دەدرێت کەم بکاتەوە، ئەمەش وەک هەوڵێک بۆ ڕێکخستنەوەی بازاڕی دراو و پاراستنی بەهای دینار.
بەپێی ڕاگەیەندراوەکەی بانکەکە، پێشتر هەر گەشتیارێک مافی وەرگرتنی 3,000 دۆلاری هەبوو بە نرخی فەرمی، بەڵام لەمەودوا ئەو بڕە بۆ 2,000 دۆلار کەم دەکرێتەوە.
بانکی ناوەندی ئاماژەی بەوە کردووە کە ئەم هەنگاوە لە چوارچێوەی ڕێکارەکانی حکوومەت و بانکەکەیە بۆ کۆنترۆڵکردنی خستنەڕووی دۆلار و ڕێگریکردن لە هەر جۆرە خراپ بەکارهێنانێکی دراوی بیانی. ئامانجی سەرەکی لەم بڕیارە بریتییە لە ڕێکخستنەوەی بازاڕ و جێگیرکردنی نرخی دۆلار بەرامبەر بە دیناری عێراقی و کەمکردنەوەی جیاوازیی نێوان نرخی فەرمی و نرخی بازاڕ.
ئەم پێشهاتە لە کاتێکدایە کە بازاڕەکانی عێراق ماوەیەکە بەدەست ناجێگیریی نرخی دراوەوە دەناڵێنن. بانکی ناوەندی هەوڵ دەدات لە ڕێگەی ئەم جۆرە گۆڕانکارییانە لە سیاسەتی نەختێنەییدا، ڕێگری لە بەرزبوونەوەی زیاتری بەهای دۆلار لە بازاڕە تەنیشتەکاندا بکات و دڵنیابێتەوە لەوەی دۆلاری پاڵپشتیکراو تەنها بۆ مەبەستی گەشت و پێویستییە ڕاستەقینەکان بەکار دەهێنرێت.
کۆمێنت (0)
تا ئێستا هیچ کۆمێنتێک نەکراوە.