دۆناڵد ترەمپ، سەرۆکی ویلایەتە یەکگرتووەکانی ئەمریکا، هەڕەشەی وەشاندنی گورزێکی سەربازیی نوێی لە ئێران کرد و ڕایگەیاند کە ڕەنگە ئەو هێرشە "ئەمشەو" ئەنجام بدرێت.
ترەمپ لە لێدوانێکی تونددا جەختی کردەوە کە واشنتن چیتر ئامادە نییە کات لەگەڵ تاران بەفیڕۆ بدات و وتی: "هیچ شتێک لەگەڵ ئەواندا مانای نەماوە."
ئەم لێدوانانەی سەرۆکی ئەمریکا لە کاتێکدایە کە گرژییە سەربازییەکانی نێوان هەردوو وڵات گەیشتوونەتە لوتکە، بەتایبەتی دوای ئەو هێرشانەی لە چەند ڕۆژی ڕابردوودا کرانە سەر کەشتییە نەوتهەڵگرەکان لە گەرووی هورمز.
ترەمپ کە ئێستا بۆ بەشداریکردن لە لووتکەی ناتۆ لە تورکیایە، ئاماژەی بەوە کرد کە هەوڵە دیپلۆماسییەکان بۆ گەیشتن بە لێکتێگەیشتن لەگەڵ حکوومەتی ئێران بێ ئەنجام بوون، و چیتر بژاردەی سەربازی وەک تاقە ڕێگە دەبینرێت بۆ وەڵامدانەوەی ڕەفتارەکانی تاران.
چاودێرانی سیاسی ئەم هەڕەشەیەی ترەمپ بە ئاماژەیەک بۆ دەستپێکردنی قۆناغێکی نوێ و مەترسیدار لە ململانێکان دادەنێن، کە ڕەنگە ناوچەکە بەرەو ڕووبەڕووبوونەوەیەکی سەربازیی فراوانتر ببات.
واشنتن پێشتر چەندین جار هۆشداریی دابووە ئێران کە هەر جۆرە هەڕەشەیەک بۆ سەر ئاسایشی نێودەوڵەتی و بەرژەوەندییەکانی ئەمریکا، وەڵامێکی توندی لێ دەکەوێتەوە. بڕیاری وەشاندنی گورزی سەربازی لە کاتێکدایە کە فشاری نێودەوڵەتی بۆ هێورکردنەوەی دۆخەکە بەردەوامە، بەڵام وا دیارە ئیدارەی ترەمپ بڕیاری خۆی بۆ "وەڵامدانەوەی یەکلاکەرەوە" داوە.
کۆمێنت (0)
تا ئێستا هیچ کۆمێنتێک نەکراوە.