ئەنجوومەنی باڵای دادوەریی عێراق ڕایگەیاند، کە لە ئەنجامی بەردەوامیی لێکۆڵینەوەکان لەگەڵ بریکاری وەزیری نەوت بۆ کاروباری دابەشکردن، تیمەکانیان توانیویانە دەست بەسەر بڕێکی تری پارەی کاشدا بگرن کە پێکهاتووە لە 11 ملیۆن دۆلار و 4 ملیار دیناری عێراقی.
بەپێی ڕاگەیەندراوێکی فەرمیی ئەنجوومەنەکە، ئەم پارانە لە چوارچێوەی ئەو دۆسیە گەورەیەی گەندەڵیدا دۆزراونەتەوە کە تێیدا عەدنان جومەیلی، بەرپرسی باڵای وەزارەتی نەوت، تۆمەتباری سەرەکییە. ئەم بڕە پارەیە دوای دانپێدانانەکانی تۆمەتبار و ئەنجامدانی پشکنینی ورد بۆ ئەو شوێنانەی کە گومانیان لێ دەکرا، دۆزراونەتەوە.
ئەم پەرەسەندنە نوێیە دوای ئەوە دێت کە لە چەند ڕۆژی ڕابردوودا دەسەڵاتە دادوەرییەکان دەستبەسەرداگرتنی دەیان ملیۆن دۆلاری تریان ڕاگەیاند، کە بەشێکی زۆریان لە ناو ماڵان و لە قووڵایی چوار مەتر لەژێر زەویدا شاردرابوونەوە. حکوومەتی عێراق جەختی کردووەتەوە کە هەڵمەتی "صولة الفجر" بۆ ڕاوەدوونانی گەندەڵکاران و گەڕاندنەوەی سامانی گشتی بۆ خەزێنەی دەوڵەت بەردەوام دەبێت و هەموو ئەو کەسانە دەگرێتەوە کە تێوەگلاون.
دۆسیەی گەندەڵیی وەزارەتی نەوت لە ئێستادا یەکێکە لە گەورەترین دۆسیەکانی لێکۆڵینەوە لە عێراق، و چاوەڕوان دەکرێت لە ئەنجامی دانپێدانانەکان چەندین بەرپرسی تری حکوومی و کەسایەتیی جیاواز دەستگیر بکرێن. ئەنجوومەنی باڵای دادوەری ئاماژەی بەوە کردووە کە تەواوی ڕێکارە یاساییەکان بۆ پاراستنی ئەو پارە دەستبەسەرداگیراوانە و گواستنەوەیان بۆ هەژمارە بانکییە فەرمییەکان گیراونەتە بەر.
کۆمێنت (0)
تا ئێستا هیچ کۆمێنتێک نەکراوە.