وەزیری شارەوانی و پارێزگاری هەولێر بەدواداچوون بۆ پڕۆژەی بەیەکەوەبەستنەوەی شەقامەکانی 120 مەتری و 150 مەتری دەکەن.
ئەمڕۆ یەکشەممە 28ـی حوزەیران، ساسان عەونی، وەزیری شارەوانی و گەشتوگوزار و ئومێد خۆشناو، پارێزگاری هەولێر، بە یاوەری سەرۆکی شارەوانی و تیمە ئەندازیارییەکان، سەردانی پڕۆژەی دروستکردنی شەقامێکی نوێی 60 مەترییان لە نزیک ڕێگەی بەحرکە کرد.
ئەم پڕۆژە ستراتیژییە کە درێژییەکەی زیاتر لە 6 کیلۆمەترە، ئامانج لێی بەیەکەوەبەستنەوەی هەردوو شاڕێی 120 مەتری و 150 مەتری شاری هەولێرە.
پڕۆژەکە بە شێوەیەکی مۆدێرن و دووساید جێبەجێ دەکرێت و سەرجەم خزمەتگوزارییەکانی وەک ئاوەڕۆی سندووقی، دیواری ڕاگر، تۆڕی ئاو و سیستەمی ڕووناککردنەوە لەخۆدەگرێت.
بە تەواوبوونی ئەم شەقامە، ئاسانکارییەکی گەورە بۆ هاتوچۆی شۆفێران دابین دەبێت و جەنجاڵییەکی زۆر لەو ناوچەیە کەم دەکاتەوە، هاوكات دەیان گوند و کۆمەڵگەی نیشتەجێبوون لە سنوورەکە لێی سوودمەند دەبن. لە ئێستادا کارکردن لە پڕۆژەکەدا بە شێوەیەکی زۆر باش بەڕێوە دەچێت.
کۆمێنت (0)
تا ئێستا هیچ کۆمێنتێک نەکراوە.