وەزیری دەرەوەی ئێران، لە لێدوانێکی نوێدا باسی لە زیانە سەربازییەکانی ئەمریکا کرد لە میانی ڕووبەڕووبوونەوەکانی لەگەڵ ئێران و ڕایگەیاند، واشنتۆن تووشی شۆک بووە.
عەباس عێراقچی وەزیری دەرەوەی ئێران، لە تۆری کۆمەڵایەتی ئێکس ڕایگەیاند: کە دوای چەند مانگێک لە دەستپێکردنی جەنگ دژی ئێران، ئێستا کۆنگرێسی ئەمریکا دانی بەوەدا ناوە کە دەیان فڕۆکەی جەنگییان لەدەستداوە، کە بەهاکەیان دەگاتە ملیارەها دۆلار.
عەباس عێراقچی ڕاشیگەیاند: هێزە چەکدارە بەهێزەکانمان وەک یەکەم هێز لە جیهاندا پشتڕاستکرانەوە کە توانیویانە فڕۆکەی جەنگیی پێشکەوتووی جۆری F-35 بخەنە خوارەوە، کە هەمیشە ئەمریکا شانازیی پێوە دەکرد.
عێراقچی هۆشداریی دایە ئەمریکا و هاوپەیمانەکانی و ڕایگەیاند، کە وڵاتەکەی وانەی زۆری لەم جەنگە وەرگرتووە و زانیاریی وردی دەستکەوتووە. گوتیشی: لەگەڵ ئەو وانە و زانیارییانەی بەدەستمان هێناون، هەر گەڕانەوەیەک بۆ جەنگ چەندین سوپرایزی زۆر گەورەتری تێدا دەبێت.
کۆمێنت (0)
تا ئێستا هیچ کۆمێنتێک نەکراوە.