دۆناڵد ترەمپ، سەرۆکی ویلایەتە یەکگرتووەکانی ئەمریکا ڕایگەیاند، کە حکومەتی ئێران بە فەرمی ئەمریکای ئاگادار کردووەتەوە کە وڵاتەکەیان لە دۆخی "داڕمان"دایە
. ترەمپ ئاماژەی بەوە کرد کە تاران داوای کردووە بە زووترین کات گەرووی هورمز بکرێتەوە، تاوەکو بتوانن لەم ماوەیەدا چارەسەرێک بۆ دۆخی سەرکردایەتی و ناوخۆی وڵاتەکەیان بدۆزنەوە.
سەرۆکی ئەمریکا لە ڕاگەیەندراوێکدا ئاماژەی بەوە دا، کە ئێرانییەکان ئێستا سەرقاڵی ڕێکخستنەوەی بارودۆخی ناوخۆیی و دیاریکردنی سەرکردایەتییەکی نوێن بۆ وڵاتەکەیان، هەروەها گەشبینی خۆی نیشاندا کە تاران دەتوانێت لەم قەیرانە تێپەڕێت و دۆخی سەرکردایەتییەکەی ڕێکبخاتەوە. ئەم داواکارییەی ئێران بۆ کردنەوەی گەرووی هورمز دوای ئەوە دێت کە داخستنی ئەو ڕێڕەوە ئاوییە ستراتیژییە، کاریگەریی وێرانکەری لەسەر ئابووریی ناوخۆیی ئێران و بازاڕەکانی جیهان دروست کردووە.
ئەم پێشهاتە دراماتیکییە دوای زنجیرەیەک پێکدادانی سەربازیی توند دێت کە لە 28ی شوباتی 2026ەوە لە نێوان ئەمریکا، ئیسرائیل و ئێران دەستیپێکرد، کە تێیدا ئێران گەرووی هورمزی بە ڕووی کەشتیوانیی نێودەوڵەتیدا داخست. داخستنی گەرووەکە بووە هۆی پەککەوتنی گواستنەوەی نزیکەی 20%ی وزەی جیهان و دروستبوونی قەیرانی ئابووریی قووڵ. ئێستا بەپێی وتەکانی ترەمپ، تاران گەیشتووەتە قۆناغی داڕمانی تەواوەتی و دەیەوێت لە ڕێگەی کردنەوەی گەرووەکەوە جۆرێک لە سەقامگیری بۆ دۆخی ناوخۆیی بگەڕێنێتەوە، کە بەهۆی جەنگ و گەمارۆکانەوە بەتەواوی پەکیکەوتووە.
کۆمێنت (0)
تا ئێستا هیچ کۆمێنتێک نەکراوە.