دادگای فیدڕاڵیی ئەمریکا بە فەرمی تۆمەتی هەوڵی تیرۆرکردنی دۆناڵد ترەمپ، سەرۆکی ئەمریکای دایە پاڵ ئەو کەسەی کە لە ئاهەنگی ساڵانەی پەیامنێرانی کۆشکی سپیدا هێرشی ئەنجامدابوو.
بەپێی بڕیاری دادگا، تۆمەتبارەکە بە مەبەستی کوشتنی ترەمپ پلانی بۆ ئەنجامدانی هێرشەکە داڕشتووە و دزەی کردووەتە ناو ئاهەنگەکە، لێکۆڵینەوەکانی دەزگای هەواڵگری و پۆلیسی فیدراڵیش دەریانخستووە کە هێرشبەرەکە چەندین بەڵگەی لەسەر بووە کە دەیسەلمێنن مەبەستی بووە زیانی کوشندە بە ژیانی سەرۆک بگەیەنێت.
ئەم تۆمەتبارکردنە دوای ئەنجامدانی لێکۆڵینەوەیەکی ورد دێت لە ڕووداوی هێرشکردنە سەر ئاهەنگەکە، کە تێیدا دەزگا ئەمنییەکان توانیویانە پلانەکە پووچەڵ بکەنەوە و هێرشبەرەکە دەستگیر بکەن. دادگا جەختی کردووەتەوە کە تۆمەتەکان قورسن و سزایەکی توندیان بەدوادا دێت، چونکە هێرشکردنە سەر ژیانی سەرۆکی وڵات وەک هەڕەشە بۆ سەر ئاسایشی نیشتمانی ئەمریکا تەماشا دەکرێت.
ئەم ڕووداوە لە کاتێکدایە کە لە ماوەی ڕابردوودا چەندین جار نیگەرانی لەبارەی سەلامەتیی دۆناڵد ترەمپ دەربڕدراوە، ئەمەش دوای ئەوەی لە چەند مانگی ڕابردوودا چەند هەوڵێکی دیکەی تیرۆرکردنی ڕووبەڕوو بووەوە. دەزگا پارێزەرەکانی سەرۆکی ئەمریکا ڕایانگەیاندووە کە ڕێکارە ئەمنییەکانیان لە هەموو بۆنە و چالاکییەکاندا بۆ بەرزترین ئاست بەرزکردووەتەوە تاوەکو ڕێگری لە هەر جۆرە پێشێلکارییەک و هەڕەشەیەکی هاوشێوە بکەن.
کۆمێنت (0)
تا ئێستا هیچ کۆمێنتێک نەکراوە.