لە نوێترین کاردانەوەی تاران بەرامبەر بە هەڕەشەکانی ئەمریکا، سەرۆکی پەرلەمانی ئێران ڕایگەیاند، وڵاتەکەی بە هیچ شێوەیەک ئامادە نییە لەژێر سایەی هەڕەشە و فشاری سەربازیدا بچێتە نێو پرۆسەی دانوستانەوە.
محەمەد باقر قالیباف، سەرۆکی پەرلەمانی ئێران، لە پەیامێکی تونددا وەک وەڵامێک بۆ دۆناڵد ترەمپ جەختی کردەوە کە کۆماری ئیسلامی ئێران مەرجەکانی واشنتۆن بۆ گفتوگۆکردن لەژێر گوشاردا ڕەتدەکاتەوە. قالیباف ئاماژەی بەوە کرد کە زمان و شێوازی هەڕەشە ناتوانێت تاران ناچاری ڕێککەوتنێک بکات کە لە بەرژەوەندیی نەتەوەیی وڵاتەکەیدا نەبێت.
ئەم لێدوانەی قالیباف لە کاتێکدایە کە ململانێکانی نێوان هەردوو وڵات گەیشتووەتە ئاستێکی مەترسیدار. دۆناڵد ترەمپ، سەرۆکی ئەمریکا، مۆڵەتێکی کۆتایی (ئۆلتیماتۆم)ی بۆ ئێران دیاریکردووە کە "ئێوارەی چوارشەممە بە کاتی واشنتۆن" کۆتایی دێت. ترەمپ بە ڕاشکاوی هۆشداری داوە کە ئەگەر تا ئەو کاتە تاران ڕێکنەکەوێت، ئەوا دامەزراوە حەیاتی و ستراتیژییەکانی ئەو وڵاتە دەکرێنە ئامانج و وتی: "زۆر بۆمب دەتەقێنەوە."
هاوکات لەگەڵ شەڕی لێدوانەکان، گرژییە مەیدانییەکانیش لە ئاوەکانی ناوچەکە هەڵکشاون. ڕۆژی ٢٠ی نیسان، هێزە دەریاییەکانی ئەمریکا دەستیان بەسەر کەشتی بارهەڵگری (M/V Touska)ی ئێرانی دا گرت، دوای ئەوەی کەشتییەکی جەنگیی ئەمریکی بۆ ناچارکردنی بە ڕاوەستان، ژووری بزوێنەری کەشتییەکەی پێکابوو. بە وتەی ترەمپ، بەهۆی گەمارۆ دەریاییەکانەوە ئێران ڕۆژانە ٥٠٠ ملیۆن دۆلار زیانی بەردەکەوێت و هاتوچۆی کەشتییەکانیش لە تەنگەی هورمز گەیشتووەتە ئاستی سفر.
لەلایەکی دیکەوە، تاران مەرجی سەرەکی بۆ هەر جۆرە گفتوگۆیەکی نوێ، بە لابردنی گەمارۆ دەریاییەکان و کۆتاییهێنان بەو ئابلۆقە ئابوورییە دەبەستێتەوە کە بەسەریدا سەپێنراوە. شارەزایانی سیاسی پێیان وایە ئەم زمانە توندەی قالیباف و هەڕەشە بێ وێنەکانی ترەمپ، ناوچەکە دەخاتە بەردەم دوو بژاردەی یەکلاکەرەوە؛ یان گەیشتن بە ڕێککەوتنێکی خێرا لە ڕێگەی شاندە دیپلۆماسییەکانەوە، یان هەڵگیرسانی ڕووبەڕووبوونەوەیەکی سەربازی فراوان.
کۆمێنت (0)
تا ئێستا هیچ کۆمێنتێک نەکراوە.